Elbasy maqalasynan keıin eldiń kóńilindegi kúdik seıileri anyq - túrkistandyq ustaz

TÚRKІSTAN. QazAqparat – Elbasy Nursultan Nazarbaev halyqty sabyrǵa shaqyra otyryp, Qazaqstannyń bul qıyndyqtan da din aman shyǵatynyn atap ótti. Túrkistan oblysy Maqtaaral aýdandyq bilim bóliminiń basshysy Muratbek Serikbaev QR Tuńǵysh Prezıdentiniń «Birlese bilgen el bárin jeńedi» atty maqalasynda beıǵamdyqtan arylyp, árkim ózi men aınalasyna jaýapkershilikpen qaraýy kerektigine basa nazar aýdarylǵanyn aıtady, dep habarlaıdy QazAqparat tilshisi.

Bilim bólimi basshysynyń aıtýynsha, tótenshe jaǵdaı kezinde Elbasy maqalasy halyqqa demeý boldy.

«Jahandy jaılaǵan jaman indettiń zardaby kúlli adamzat balasyna ońaı tıip otyrǵan joq. Ekonomıkasy damyǵan alyp memleketterdegi jaǵdaı da turaqsyz. Bizdiń elimizde bolyp jatqan oqıǵalar da, adam shyǵyny da bul vırýspen kúresti áli de shırata túsýdi, toqtatpaýdy talap etip otyr. Adamdardyń óz qaýipsizdigi úshin úıde otyrýy mańyzdy. Árıne, qaýip bar, biraq, solaı eken dep jaǵdaıdy ýshyqtyryp, dúrbeleń týdyrýdyń qajeti joq. Bul qıyndyqty birlese, aqyldasa otyryp sheshýge bolatynyn jáne sol jolda túrli jumystar júrgizilip otyrǵanyn túsinemiz. «Rýhy myqty, ózine senimdi adamdy qıyndyqtar shynyqtyrady. Sondyqtan biz boıkúıezdikten, saryýaıymnan, enjarlyqtan arylyp, tyǵyryqtan shyǵýdyń jolyn izdegen búkil álem halqymen birge shıryǵa, shyńdala túsýimiz kerek» deıdi N.Nazarbaev. Shynynda, el basyna tóngen bul qıyndyqty aýyzbirshilikpen, jumyla birlesken kezde ǵana jeńe alamyz»,- deıdi Muratbek Serikbaev.

Bilim salasynyń mamany sondaı-aq, qazaq halqy budan da úlken qıyndyqtardy bastan ótkergenin aıtady. Al Elbasynyń halyqty tártipke baǵynyp, indettiń aldyn aldyn alýǵa shaqyrýy jurtshylyqty birlikke úndeıdi dep otyr.

«Qazaqtyń basynan talaı qıynshylyq ótkeni tarıhtan belgili. Jan-jaǵynan antalaǵan jaýyna birge qarsy turyp, qalyń jaýǵa toıtarys berip, elin-jerin saqtap qaldy. Búgingi ahýal da halyqtyń birlikte, yntymaqtyqta jumys isteýge úndeıdi. Memlekettiń bul qıyndyqtan shyǵý úshin qoldan kelgenniń bárin jasap jatqanyn kórip jáne sol jolda el aǵalarynyń júrekjardy sózderin oqyǵannan keıin eldiń kóńilindegi kúdik seıileri anyq. Biz birgemiz», - deıdi Muratbek Serikbaev.