Elbasy: Məýlen Əshimbaev partııa mərtebesin kóterýge úlken úles qosa alady

ASTANA. QazAqparat - Qazaqstan Prezıdenti «Nur Otan» partııasynyń ortalyq apparatynda boldy, dep habarlaıdy Aqordanyń baspasóz qyzmeti. 

Memleket basshysy «Nur Otan» partııasy tóraǵasynyń jańa birinshi orynbasary Máýlen Áshimbaevty tanystyryp, Muhtar Qul-Muhammedke atqarǵan jumysy úshin alǵys aıtty.

«Muhtar Qul-Muhammed Qazaqstan Respýblıkasy Parlamenti Senatynyń depýtaty bolyp taǵaıyndalýyna baılanysty partııa tóraǵasynyń birinshi orynbasary laýazymynan bosatylady. Osy jaýapty qyzmettegi úlesińiz ben sińirgen eńbegińiz úshin alǵys bildiremin. Osyǵan oraı partııa tóraǵasynyń birinshi orynbasary laýazymyna Máýlen Áshimbaevty taǵaıyndaý týraly sheshim qabyldandy. Ol bes jyldan astam Parlament Májilisiniń depýtaty bolyp, komıtet basqardy. Men onyń partııa mártebesi men rólin arttyrýǵa úlken úles qosatynyna senimdimin. Jumystaryńyzǵa sáttilik tileımin», - dedi Nursultan Nazarbaev.

Elbasy «Nur Otan» partııasynyń aldynda turǵan qazirgi mindetterge erekshe nazar aýdardy.

«Nur Otan» partııasy memleket saıasatyn aıqyndaıtyn mańyzdy saıası kúshke aınaldy. Partııa barlyq baǵdarlamalarymyzdy iske asyrýǵa atsalysyp keledi», - dedi Qazaqstan Prezıdenti.

Memleket basshysy barlyq memlekettik jáne salalyq baǵdarlamalardyń sapaly júrgizilip, olardyń iske asyrylýyna baqylaýdy kúsheıtýdiń mańyzdy ekenin atap ótti.

Nursultan Nazarbaev ulttyq ekonomıkany tórtinshi ónerkásiptik revolıýtsııa jaǵdaıyna beıimdeý qajettigin aıtty.

«Eger biz álemdik damýdan qalyp qoımaımyz desek, onda alǵa umtylýymyz qajet. Sol sebepti bıylǵy Joldaý osy reformalardy oryndaýǵa baǵyttalǵan. Buǵan deıingi barlyq baǵdarlamalarymyz osyǵan arnalǵan bolatyn. Másele olardyń qalaı jumys isteýinde. Biz eksporttyq ónim shyǵaratyn kásiporyndar qurýymyz qajet», - dedi Qazaqstan Prezıdenti.

Nursultan Nazarbaev «Nurly jol» ınfraqurylymdyq damý baǵdarlamasyn iske asyrýdyń ózektiligin atap ótti.

Sońynda Elbasy memlekettik baǵdarlamalardy ázirleý jáne iske asyrý isindegi partııanyń belsendiligin arttyrýdyń mańyzdylyǵyna nazar aýdardy.

«Oblystarda partııa uıymdarymyz bar. Olar belgilengen mindetterdi iske asyrýda belsendi bolýǵa tıis», - dedi Qazaqstan Prezıdenti.