Elbasy: Qubylmaly álemdegi bir ǵana máńgi qundylyq - qoǵamnyń birligi
Qazaqstan halqy Assambleıasynyń Tóraǵasy Nursultan Nazarbaev jıynǵa qatysýshylardy sessııa jumysynyń bastalýymen quttyqtap, elimizde beıbitshilik pen turaqtylyqty saqtaý isindegi Qazaqstan halqy Assambleıasynyń mańyzdy rólin atap ótti.
- Jahandyq álem kúshti transformatsııany bastan ótkerip otyr. Biz bárimiz múlde jańa tarıhı dáýirde ómir súrip jatqanymyzdy túsinemiz. Ekonomıka, qoǵam ómiri jáne tehnologııa túbegeıli ózgerdi. Bul jańalyqtardy qabyldap, kóp nárseni úırenemiz, biraz nárseni isteı alamyz. Biraq, bul qubylmaly álemde bir ǵana máńgi ári keshendi qundylyq bar. Ol - qoǵamnyń birligi men ultaralyq kelisim, - dedi Elbasy.
Nursultan Nazarbaev táýelsizdik jyldary Qazaqstan halqynyń elimizde etnosaralyq qarym-qatynastardyń keleshegine qatysty destrýktıvti boljamdardyń bárin joqqa shyǵarǵanyna nazar aýdardy.
- Biz ekonomıkasy qarqyndy damyp kele jatqan myqty memleket qurdyq. Tarıh synaqtarynyń bárin birge eńserdik. Pragmatıkalyq jáne sarabdal syrtqy saıasatymyzdyń arqasynda halyqaralyq bedelimizdi bıiktettik. Elimizdegi etnosaralyq qarym-qatynastardyń úlgisi teńdestirilgen, ýaqyt jaǵynan tıimdi ári tájirıbeden ótkizilgen. Bul bárine úlgi bolýǵa tıis, - dedi Elbasy.
Sessııa barysynda Elbasy Qazaqstan qoǵamyndaǵy turaqtylyqty saqtaý úshin barlyq tetikterdiń qalypty ári tıimdi jumysyn qamtamasyz etýdi tapsyrdy.
Qazaqstannyń Tuńǵysh Prezıdenti memlekettik organdar janyndaǵy medıatsııa ınstıtýty men qoǵamdyq keńesterdiń jumysyn jandandyrý qajettigin aıtty. Sonymen qatar, Elbasy Assambleıa kásipkerleriniń qaýymdastyǵyna arqyly sheteldik ınvestorlarmen ekonomıkalyq yntymaqtastyqty nyǵaıtýǵa jáne Qazaqstan halqy Assambleıasynyń depýtattyq korpýsynyń áleýetin belsendi paıdalanýǵa shaqyrdy.
Nursultan Nazarbaev sóılegen sózinde barsha musylman qaýymyn aldaǵy qasıetti Ramazan aıynyń bastalýymen jáne hrıstıan ókilderin Pasha merekesimen quttyqtady.
- Halqymyzǵa, sonyń ishinde Qazaqstan halqy Assambleıasynyń barlyq múshesine qoldaý kórsetip, túsinistik tanytqany úshin rızashylyǵymdy bildirgim keledi. Prezıdent saılaýy 9 maýsymǵa taǵaıyndaldy. «Nur Otan» partııasynyń kezekten tys HІH sezinde Qasym-Jomart Kemeluly Toqaevtyń kandıdatýrasy usynyldy. Ol - tájirıbeli memleket qaıratkeri, elge basshylyq etýge laıyq Qazaqstannyń naǵyz patrıoty. Barsha qazaqstandyqtardy, Assambleıanyń múshelerin aldaǵy saılaýǵa belsendi atsalysyp, taǵy bir ret birligimizdi tanytýǵa shaqyramyn. Barsha qazaqstandyqtarǵa aspandarynyń ashyq bolýyn, ár otbasyna beıbit ómir, amandyq jáne baq-bereke tileımin, - dedi Tuńǵysh Prezıdent.
Sessııa barysynda QHA Tóraǵasynyń jańa orynbasarlary bolyp ıÝsýp Kelıgov jáne Sherzod Pýlatov taǵaıyndaldy.