Elbasy: Konstıtýtsııa áleýeti Qazaqstannyń damýyna uzaq jyldar qyzmet etedi

  ASTANA. QazAqparat - Búgin Astanada «Konstıtýtsııa: quqyq ústemdiginiń, azamattyq qoǵam men zamanaýı memlekettiń qundylyqtaryn iske asyrý» atty halyqaralyq konferentsııa óz jumysyn bastady, dep habarlaıdy QazAqparat.

QR Memlekettik hatshysy Gúlshara Ábdiqalyqova konferentsııa qatysýshylaryna arnalǵan Elbasy Nursultan Nazarbaevtyń quttyqtaý sózin oqyp berdi.
 

«Dástúrge aınalǵan Qazaqstan Respýblıkasynyń Konstıtýtsııasy kúnine arnalǵan halyqaralyq konferentsııaǵa qatysyp otyrǵan Sizderge sálemimdi joldaımyn. Konferentsııanyń ózekti kún tártibi zamanaýı demokratııalyq, quqyqtyq, áleýmettik jáne zaıyrly memlekettiń negizin qurýdy qamtamasyz etken konstıtýtsııalyq prıntsıp pen normalardyń erekshe mańyzyn atap ótedi», - dedi Memleket basshysy.

Osy oraıda Prezıdent 1995 jyly búkilhalyqtyq referendýmda qabyldanǵan QR Konstıtýtsııasy qazaqstandyq memlekettilik damýynyń, adam quqyqtary men bostandyqtarynyń múltiksiz saqtalýynyń berik irgetasyn qalaǵanyn atap ótti.

«Táýelsizdik jyldarynda qalyptasqan, halyqaralyq qoǵamdastyqta moıyndalǵan qazaqstandyq qoǵam damýynyń biregeı modeli qoǵamdyq kelisim men turaqtylyq, ekonomıkalyq damý jáne Qazaqstan halqynyń ortaq tarıhı taǵdyry týraly konstıtýtsııalyq erejelerdiń múltiksiz saqtalýynyń arqasynda múmkin boldy. Búgingi tańda elimizde Parlamenttiń, Úkimettiń jáne jergilikti ókildi organdardyń ókilettiligin edáýir keńeıtýge múmkindik bergen Konstıtýtsııalyq reforma sátti júzege asyryldy. Halyqtyń quqyqtyq mádenıet deńgeıin kóterý, Konstıtýtsııamen qabyldanǵan zańdarǵa joǵary qurmet dárejesin qamtamasyz etý ózekti másele. Quqyqtyq ústemdik etý, Konstıtýtsııanyń joǵary turýy, zańnyń bıligi - bul búgingi tańda Qazaqstannyń sátti damýynyń jáne onyń zamanaýı jahanda laıyqty orynǵa ıe bolýynyń asa mańyzdy máselesi. Qoldanystaǵy Konstıtýtsııanyń áleýeti Qazaqstannyń odan ári damýyna jáne álemniń barynsha damyǵan otyz eliniń qataryna kirýine uzaq jyldar qyzmet etetinine kámil senemin. Sizderdi Qazaqstan Respýblıkasynyń Konstıtýtsııa kúnimen quttyqtaımyn!», - dedi Elbasy.

Bul shara QR Konstıtýtsııalyq keńesi, QR Tuńǵysh Prezıdenti- Elbasynyń qorymen, Eýropa keńesiniń quqyq arqyly demokratııa úshin Eýropalyq komıssııamen, Astanadaǵy EQYU baǵdarlamasynyń keńsesimen, sondaı-aq elordadaǵy jetekshi ýnıversıtettermen birlesip ótkizildi.

Aıta keteıik, jıynǵa memlekettik qurylymdardyń basshylary, bedeldi halyqaralyq uıymdardyń ókilderi, konstıtýtsııalyq baqylaý organdary, 20-dan astam halyqaralyq belgili ǵalymdar men quqyqtanýshylar qatysýda.