Elbasy qolynan úzdik dıplom alǵan kún

ASTANA. QazAqparat - Jýyrda Elbasynyń qatysýymen ­Nazarbaev Ýnıversıtetiniń alǵashqy túlekteriniń oqý bitirý rásimine arnalǵan saltanatty shara ótti.

Nazarbaev Ýnıversıteti - Elbasynyń tól jobasy. Álemniń damyǵan elderi eń aldymen ózderiniń áıgili ýnıversıtetterimen maqtanady. Ol ýnıversıtetterde bilim alǵan mamandar tórtkúl dúnıeniń qaı tarabynda bolmasyn joǵary suranysqa ıe. Sapaly bilim, bilikti maman - zaman talaby. Saltanatty jıynda Memleket basshysy:

- Búkil Qazaqstanymyzdyń ómirine joǵary bilim flagmany - bizdiń tarıhymyzdaǵy alǵashqy álemdik deńgeıdegi ǵylym-bilim ortalyǵynyń birinshi túlekteri qosylaıyn dep otyr. Bizdiń elimiz jastardyń jańa tolqynyna, jan-jaqty daıyndalǵan bilikti mamandarǵa ıe bolaıyn dep otyr. Bizdiń Ult Jospary negizinde memleketimizdi jańǵyrtý baǵytynda tereń qaıta qurýlarǵa kirisken qazirgi sátimizde bul tipti erekshe mańyzdy bola túsedi, - dep Nazarbaev Ýnıversıtetiniń qurylýy arqyly Astanada jahandyq bilimniń qýatty kóziniń paıda bolǵandyǵyn atap ótti. Iá, Nazarbaev Ýnıversıteti - elimizdiń betkeustar joǵary oqý orny. Ýnıversıtet qazirgi zamannyń eń ozyq tehnologııalarymen jabdyqtalǵan. Ǵylym men bilimniń ­zamanaýı úlgileri, ınnovatsııalyq tehnologııalar da - osynda. Oqý orny eń alǵash 2010 jyly qurylǵan bolatyn. Kózdi ashyp-jumǵansha alǵashqy túlekteri de qanat qaǵyp otyr. Endi olar elimizdiń ár salasynda jemisti qyzmet etip, memleketimizdiń irgetasyn nyqtaı túsedi. Qazirgi ýaqyt álemdik deńgeıde básekege qabiletti bola alatyn jas mamandarǵa zárý. Mundaı talaptarǵa, sózsiz, Nazarbaev Ýnıversıtetiniń túlekteri jaýap beretini aıqyn. Óıtkeni ýnıversıtetti qurýdaǵy o bastaǵy maqsat ta osy edi ǵoı - álemdik kóshten qalmaı, damyǵan ozyq memleketterdiń kadrlarymen ıyq teńestire alatyn mamandardy ózimizde daıarlaý. Zamanǵa óte-móte qajetti kompıýterlik ǵylymdar, ınjenerlik mehanıka, robotty tehnıka jáne mehatronıka, bilim berýdi basqarý, bıologııalyq ǵylymdar, elektrlik jáne elektrondyq ınjenerııa, qurylys ınjenerııasy jáne taǵy basqa mamandyqtardy elimizde Nazarbaev Ýnıversıteti oqytady. Endigide mektep túlekteri shetelde beriletin bilimge qyzyǵyp, sharq urmaıdy. Mundaı múmkindik Elordamyzda jasalǵan. Stýdentter men oqytýshylar ýnıversıtet­tegi jasalǵan jaǵdaı úshin Memleket basshysyna alǵystaryn aıtyp, kúsh-jigerlerin eldiń budan ári damý jolyna jumsaıtyndaryn jetkizdi. Sózin aıaqtaı kele, Memleket basshysy úzdik túlekterge dıplom tabystady. Elbasynyń qolynan úzdik dıplom alǵandar qatarynda Álııa Jaqsıeva, Aısulý Aıtbekova, Anar Qasymova, Ádilet Ótemisov, Temirlan Seıdahmetov, Janar Shoqaeva, Aıjan Temirbaeva, Altynaı Dúısenbekova, Valentına Vınokýrova jáne basqalar boldy. Sóz kezegin alǵan Nazarbaev Ýnıversı­te­tiniń Joǵary bıznes mektebiniń túlegi Qazybek Áýbákirov bylaı dedi: - Bizder Qazaqstannyń baqytty jas­ta­ry­myz. Bizge jaqsy bilim berýge janda­ryn salyp jumys istegen ýnıversıtet pre­zıdenti Shıgeo Katsý myrza bastaǵan bar­lyq oqytýshylarmen qatar, qolaıly jaǵdaı jasaǵan ákimshilik qyzmetkerlerine de úlken raqmet. Biz sizderdiń álemge jiberip otyrǵan elshilerińizbiz. Biz ýnıversıtet qabyrǵasynda júrip, ǵylymı jumystarmen shuǵyldaný múmkindigine ıe boldyq. Júrek aýrýlaryn aıqyndap emdeýge arnalǵan jańa tehnologııalyq quraldy oılap taptyq. Endi ol óndiristik negizde shyǵarylatyn ­bolady. Quralda mindetti túrde «Qazaqstanda jasalǵan» degen sóz turady. Sóıtip, ­Nazarbaev Ýnıversıteti onyń qabyrǵasynda ­júrip-aq kásiptik turǵydan damýymyzǵa jaqsy qolaıly jaǵdaı týǵyzdy. Aqyn Maǵjan Jumabaev aıtqandaı, «Biz jastarǵa senemiz!». Olar Nazarbaev Ýnıversıtetinde alǵan tereń bilimderi arqyly Qazaqstannyń atyn álemge áıgileı túsip, ǵylymı jańalyqtardy ashýda aldaryna jan salmaıtyn kásibı maman bolady degen oıdamyz. Óıtkeni Elbasy olarǵa: «Eldi damytyp, halyqty baqytqa, baq-berekege jetkizý isi sizderge júkteledi» dep zor senim bildirdi. Senimdi aqtaý - jastardyń qolynda!