Elbasy qıyn kezeńde elimizdiń bilim salasyna kóp kóńil bóldi - depýtat Juldyz Súleımenova
Juldyz Súleımenovanyń aıtýynsha, Elbasy maqalasynda elimizdiń Táýelsizdiginiń qasterli ekendigin, aıaýly ekendigin jáne ony kózimizdiń qarashyǵyndaı qorǵaý – eń basty mindetimiz ekenin tarıhtyń tolǵanysty sátterimen jetkizgen.
«Barlyǵymyz táýelsizdik alǵan 90-shy jyldardyń kýágerimiz, men 1991 jyly mektep tabaldyryǵyn attaǵan oqýshy edim. Táýelsizdikpen ósip, egemendikpen er jettik. Qandaı qıyn kezeńdi artqa tastap, búginde qaı sala bolmasyn aýyz toltyryp aıtarlyq jetistikterimiz bar. Osy jetistikterdiń artynda Elbasymyzdyń halqymyz úshin jasaǵan mańyzdy memlekettik sheshimderi ári batyl reformalary tur.
Elbasy el tizginin qolyna alǵan alǵashqy kúnnen-aq bastap, qıyn kezeńde elimizdiń bilim salasyna kóp kóńil bóldi. Sonyń arqasynda bilim jáne ǵylym elimizde jańasha qarqynmen damydy. Memleketimizdegi bilim salasyna qatysty saıasat áý bastan durys júrgizildi. Tuǵyrly Táýelsizdigimizdiń alǵashqy kezeńinen Elbasy memleket damýynyń negizgi mejesi ári temirqazyǵy retinde – bilim men ǵylym salasyn aıqyndady. Únemi jańashyldyqqa umtyldy, sóıte tura óz mentalıtetimizdi, biregeı bolmysymyzdy joǵaltpaýǵa kóp nazar aýdardy», - dedi depýtat.
Juldyz Súleımenovanyń aıtýynsha, ýaqyt pen keńistik úshin 30 jyl nebári qas-qaǵym sát. Biraq, osy aralyqta, Elbasymyz halqymyzdy barlyq qıyndyqtardan aman-esen saqtap, elimizdiń abyroıyn asqaqtatyp, bilim men ǵylym salasynda zor tabystarǵa jetkizdi. Sonyń negizinde, 30 jyldyq qalyptasý men damýdyń memlekettik tarıhynda bilim salasy elimizdegi áleýmettik, ǵylymı-tehnıkalyq jáne ıntellektýaldy kapıtaldy damytýdyń sheshýshi faktoryna aınaldy.
«Táýelsizdik jyldarynda Qazaqstan Respýblıkasynyń Tuńǵysh Prezıdenti, Elbasymyz Nursultan Ábishulyna Nazarbaevtyń bastamasymen júzege asyrylǵan ınnovatsııalyq jobalar jastarǵa jańa múmkindikterge jol ashty, jan-jaqty damýdy qamtamasyz etti», dedi Juldyz Súleımenova
Onyń aıtýynsha, búgingi tańda, Memleket basshysy Qasym-Jomart Kemeluly Toqaev elimizdi odan ári órkendetý jolynda tıimdi reformalardy sabaqtastyqpen jalǵastyrý ústinde.
Elbasy «Táýelsizdik taǵylymy» maqalasynda: «Táýelsiz elimizdiń basty baılyǵy – adam. Memleketimizdiń tiregi de, altyn dińgegi de – Qazaqstan halqy. Men boıymdaǵy qýat, qyzmetimdegi tájirıbe, oıymdaǵy nár – bári-bárin halqyma qyzmet etýge jumsap kelemin. Sol úshin táýelsizdiktiń alǵashqy jyldarynan beri taǵdyr talaıymen dúnıeniń tórt buryshyna tarydaı shashylǵan mıllıonnan astam qandastarymyzdy atamekenge aldyrdym. Bul aıtar aýyzǵa ǵana ońaı. Jer betinde halqynyń sany mıllıonǵa jetpeıtin qanshama memleket bar. Biz osynshama qandastarymyzdy shet elderden aldyryp qana qoımaı, basyna – baspana, ózine – jumys, urpaǵyna bilim berdik. Bul is áli de jalǵasyn taba beredi. Osynyń bári táýelsizdiktiń arqasynda ǵana múmkin bolǵanyn umytpaýymyz kerek. Elimiz táýelsizdiktiń otyz jyly ishinde kóptegen qıyndyqty eńserip, ulanǵaıyr tabystarǵa qol jetkizdi. Alda alar asýlarymyz ben baǵyndyrar bıikterimiz de, yqtımal syn-qaterler de az emes», – dep atap ótti.
«Rasynda, qazirgi ómir súrip jatqan zamandy fýtýrologtar «qysqa kókjıekter» kezeńi nemese týrbýlentti ýaqyt dep ataıdy. Pandemııa kezeńinde únemi ıkemdelýdi, jaǵdaıǵa qarap lezde sheshim qabyldaýdy úırenip kelemiz. Qazirgi tehnologııalardyń bilim berýge tıgizetin áseri, qundylyqtar daǵdarysy, ǵalamdyq aqparattyń tolqyny, ekonomıka men eńbek naryǵy jańa sheshimderdi izdeýge negiz bolary sózsiz.
Bul týrasynda, Elbasymyz: «Jahandyq jańa trendterdiń qatarynda bolý úshin biz «Bolashaq» baǵdarlamasyn jasap, jastarymyzdy álemniń eń úzdik ýnıversıtetterinde oqyttyq. Al qarajat jetkiliksiz bolǵan ótken ǵasyrdyń 90-jyldary biz stýdentterdiń oqý aqysyn, júrip-turýy men kúnkórisin tólep berdik. Osy ýaqytqa deıin el ıgiligi úshin 15 myńnan astam maman daıarlandy. Olar óz Otanynyń qamqorlyǵyn sezinip, elge qyzmet etip, bizdiń úmitimizdi aqtaıdy dep senemin. Keıinnen álemdik deńgeıdegi joǵary oqý orny – Nazarbaev ýnıversıteti, Nazarbaev zııatkerlik mektepteri jelisi, aqparattyq tehnologııalar salasyndaǵy startaptarǵa arnalǵan «Astana-hab» halyqaralyq tehnoparki ashyldy. Bizdiń jastar osyndaı ilgerishil ózgeristerdiń kósh basynda bolýy qajet», – degen oıy arqyly ǵalamdyq básekege qabiletti daryndy jastarymyzǵa aldaǵy 30 jylda, eldigimizdi nyǵaıtýdyń jańa kezeńinde úlken senim artyp otyr», - dedi depýtat.
Juldyz Súleımenovanyń aıtýynsha, elimizde táýelsizdik jyldary myńdaǵan mektepter jáne balabaqshalar boı kóterdi, ustazdardy mártebesine saı qoldaý jáne yntalandyrý sharalary turaqty ósýde.
«Joǵary oqý oryndaryn zamanǵa saı damytý, ǵalymdarymyzdyń izdenisine qajetti granttar bólý, «Bolashaq» baǵdarlamasy, «Nazarbaev Zııatkerlik mektepteri», Nazarbaev Ýnıversıtetin qurý bilim salasyn damytýǵa arnalǵan ınnovatsııalyq sheshimder bolǵany, ras. Nazarbaev Zııatkerlik mektepteri jelisi jáne Nazarbaev Ýnıversıteti Táýelsizdigimizdiń 30-jyldyǵynda elimizdiń ulttyq brendi retinde qalyptasyp, Qazaqstannyń ıntellektýaldy elıtasyn tárbıeleýdiń irgetasy retinde memleket tarıhynda orta bilim, joǵary bilim men ǵylym júıesin damytýǵa negiz boldy, mektepterdiń, ýnıversıtetterimiz ben ǵylymdy damytýdyń jańa kezeńine jol ashty. Endigi meje, Nazarbaev Zııatkerlik mektepteriniń deńgeıinde sapaly úzdik bilimge qoljetimdilikti qamtamasyz etý, sonymen qatar Nazarbaev Ýnıversıteti tájirıbesi negizinde 2 ozyq óńirlik joǵary oqý ornyn qurý, ǵylymdy qoldaý, zııatkerlik áleýetti damytý úshin básekege barynsha qabiletti 20 joǵary oqý ornynyń bazasynda akademııalyq artyqshylyq ortalyqtaryn qurý», - dedi ol.
Juldyz Súleımenovanyń pikirinshe, qandaı eńbek naryǵy ornap, postmodernısttik, aqparattyq jáne postaqparattyq kezeńde qandaı qaıshylyqtar bolmasyn, devalvatsııaǵa ushyramaıtyn basty qundylyqtar – adamnyń bilimi, adamgershilik jáne rýhanı áleýetin kórsetetin tárbıesi, qalyptasqan daǵdysy, quzyrettiligi, áleýmettik ortada óziniń jetilýi.
«Mine, táýelsizdik jyldarynda bilim men ǵylymdy damytýda izgi bastamalardy kóterip, Jastarǵa únemi senimi men mol múmkindikterge jol ashqan úlken júregi jáne batyldyǵy úshin Elbasymyzǵa azamattyq rızashylyǵymdy bildiremin!
Tuǵyrly Táýelsizdigimizdiń 30-jyldyǵy barshamyzǵa qutty bolsyn! Aıtýly jaqsylyqtarǵa, jańa jetistikterge bastasyn», - deıdi ol.