Elbasy qazaqstandyqtarǵa qandaı keńes berdi

ASTANA. QazAqparat - Elordada ótip jatqan  VIII Azamattyq forýmda Elbasy Nursultan Nazarbaev qazaqstandyqtarǵa ómirlik keńes berdi,  dep habarlaıdy QazAqparat tilshisi.

«Biz anaý jetpeıdi, mynaý jetpeıdi dep únemi shaǵymdanamyz. Eger ómir súrý tym qıyn bolyp bara jatsa, aýrýhanaǵa bar. Tipti bolmaı bara jatsa, zırat arala. Ol jaqta jatqandardyń hali saǵan qaraǵanda áldeqaıda jaman. Bizdiń aıaq-qolymyz saý, biraq jaǵdaı jaman, oǵan eshteńe isteı almaımyz dep shashymyzdy julamyz... Ómirde bári de múmkin. Ózińdi qolǵa alyp, jumys isteýge májbúrle. Mine, barlyq másele osynda. Jastardy da osyǵan úıretýimiz kerek», - dedi Elbasy.

Memleket basshysy múmkindigi shekteýli jandarǵa qamqorlyq jasap, halyqtyń az qamtylǵan tobyna qoldaý kórsetip kele jatqan úkimettik emes uıymdardyń jumysyna rızashylyq bildirdi.

«Azamattyq qoǵam da jetim balalarǵa, jalǵyzbasty, aýrý jáne qart adamdarǵa qamqor bolýy tıis. Eshkimi joq, jalǵyz qalatyn adamdar da bar. Olar tipti nan alý úshin dúkenge de bara almaıdy. Olarmen kim aınalysady? Áleýmettik qyzmetter mundaı adamdardy bilip, qalaı ómir súrip jatqanyn qadaǵalap otyrýy tıis», - dedi Nursultan Nazarbaev.

Elbasy eshkimi joq, jalǵyzbasty  adamdardy qarttar úıine ornalastyrý ne bolmasa olarǵa qamqorlyq tanytýdy eriktilerge tapsyrý qajettigin aıtty.