Elbasy: Qazaqstandaǵy bereke men birlikti qorǵaý - jalpy maqsatymyz

ASTANA. QazAqparat - Qazaqstanda eshkim de ultyna, tiline nemese dinı senimine qaraı qysym kórmeýi tıis. Bul týraly búgin Elbasy Nursultan Nazarbaev elordadaǵy «Qazaq eli» monýmenti aldynda Narýyz meıramyna oraı uıymdastyrylǵan shara barysynda málim etti.

«Qazaqstanda beıbitshilik pen dostyq ornady, halyqtyń ál-aýqaty artyp keledi. Osy arqyly biz Konstıtýtsııadaǵy belgilengen maqsattardy oryndap otyrmyz. Atap aıtqanda, Qazaqstanda barlyǵy teń, sondyqtan eshkim de ultyna,tiline nemese dinı senimine qaraı qysym kórmeýi tıis. Bizde biryńǵaı Otanymyz ben biryńǵaı maqsatymyz bar. Osynyń arqasynda Qazaqstan gúldenip, damyp kele jatyr»,-dep toqtaldy Memleket basshysy. N. Nazarbaev Táýelsizdik jyldaryndaǵy elimizdiń jetistikterin jáne beıbitshilikpen tynyshtyqty barsha halyq bolyp kózdiń qarashyǵyndaı qorǵaý kerek ekenin aıta kele, «Beıbitshilik degen - óte názik ári kúrdeli uǵym. Jyl saıyn álemde 30 qarýly qaqtyǵystar oryn alyp, júzdegen myń adam ajal qushýda... Sondyqtan da kez kelgen teris is-qımyl bizdiń jetistigimizdi buzýy múmkin. Biz beıbitshiliktiń arqasynda damyp kelemiz. Bireýler bizdiń osy «altyn jetistigimizge» qyzǵanyshpen qaraýy múmkin, osy oraıda elimizdegi bereke men birlikti qorǵaý jalpy maqsatymyz bolyp tabylady»,-dep túıdi Prezıdent.