Elbasy: Qazaqstan men Japonııa BUU Qaýipsizdik keńesindegi birlesken jumysyn ıadrosyz álem jolyndaǵy kúreske arnady
«Búginde Japonııa memleketaralyq ózara qarym-qatynastyń, onyń ishinde Ortalyq Azııadaǵy da teńbe-teń sáýletin qalyptastyrý úderisine eń basty qatysýshylarynyń biri sanalady. Bizde belsendi qatysýdamyz jáne muny baǵalaımyz. Biz BUU Qaýipsizdik keńesiniń turaqty emes múshesimiz jáne bul birlesken jumysymyzdy ıadrosyz álem úshin kúreske arnaıtyn bolamyz. Bul jalpy adamzattyń, bizdiń aldymyzda turǵan mindet. Munan bólek, ıadrolyq qarýsyzdaný jáne taratpaý isinde jetistikke jetý úshin ózge de syn-qaterlerge qarsy birlese jumys isteımiz», - dedi Nazarbaev.
Osy rette Memleket basshysy Japonııaǵa resmı sapary aıasynda atom bombasynan qaza tapqandarǵa qurmet kórsetý úshin Hırosıma qalasyna baratyndyǵyn jetkizdi. Qazaqstandyqtardyń da atom bombasynan zardap shekkendigin, Semeı ıadrolyq synaq polıgonynda Nagasakı men Hırosımaǵa tastalǵan bombadan 2500 ese asyp túsetin jarylystyń jasalǵanyn atap ótti.
Sóz sońynda Elbasy Japonııa Premer-Mınıstrine qonaqjaılyǵy úshin rızashylyǵyn bildirdi.
«Biz elderimiz arasyndaǵy odan arǵy yntymaqtastyqqa, strategııalyq dostyqqa taǵy bir negiz qaladyq dep úmit artamyn», - dedi Qazaqstan Prezıdenti.