Elbasy Qazaqstan áıelderin alda kele jatqan merekelerimen quttyqtady
«Shýaqty kóktem ana men asyl jar, aıaýly qaryndastyń meıramymen bastalady. Sondyqtan men áýeli barshańyzdy aldaǵy merekelerińizben shyn júrekten quttyqtap, baıandy baqyt, dúnıedegi bar jaqsylyqty tileımin»,-dedi N. Nazarbaev búgin Astanadaǵy Táýelsizdik saraıynda ótip jatqan Qazaqstan áıelderiniń tuńǵysh sezinde sóılegen sózinde.
Prezıdent Qazaqstannyń áıelderi otbasy berekesin saqtaýmen birge Táýelsizdikti nyǵaıtý isine de eseli úles qosyp kele jatqanyn aıryqsha atap kórsetti. «Sizder otbasyndaǵy beıbitshilik pen tynyshtyqty saqtaýshysyzdar, sonymen bir mezgilde elimizdiń Táýelsizdiginiń nyǵaıýyna aıtarlyqtaı úles qosyp kelesizder. Búgingi sezd sonyń jarqyn dáleli», - dedi Elbasy.
Prezıdent el ıgiligi úshin istep jatqan eren eńbekteri úshin áıel azamattarǵa alǵysyn bildirdi. «Qazaqstan áıelderi búginde Іshki jalpy ónimniń 40 paıyzyn qalyptastyrýda, bul úles turaqty túrde ósip keledi. Áıelder memlekettik basqarý júıesinde de jumys isteýde, onnan astam áıelder mınıstrlikterdi basqarýda, júzden astamy depýtat boldy, men osy áıel azamattardyń el ıgiligi úshin bergen keńesterine rızashylyǵymdy bildiremin», - dedi N. Nazarbaev. «Biz jaqynda jetinshi qysqy Azııa oıyndaryndaǵy jarqyn jeńistiń kýási boldyq. Bizdiń quramanyń Azıadada jeńip alǵan barlyq medaldarynyń 40 paıyzy qyzdardyń úlesinde», - dedi Prezıdent.