Elbasy «Qazaq tili» qoǵamynyń prezıdenti Ómirzaq Aıtbaevtyń otbasyna kóńil aıtty

NUR-SULTAN. QazAqparat – QR Tuńǵysh Prezıdenti - Elbasy Nursultan Nazarbaev Halyqaralyq «Qazaq tili» qoǵamynyń prezıdenti Ómirzaq Aıtbaevtyń otbasyna kóńil aıtý jedelhatyn joldady, dep habarlaıdy QazAqparat Elbasynyń baspasóz qyzmetine silteme jasap.

Qazaqstannyń Tuńǵysh Prezıdenti kórnekti ǵalym, akademık Ómirzaq Aıtbaevtyń ómirden ótýine baılanysty aýyr qaıǵyǵa ortaqtasyp, kóńil aıtty.

«Halyqaralyq Qazaq tili qoǵamynyń prezıdenti qyzmetin atqarǵan ol memlekettik tildiń qoldanys aıasyn keńeıtý baǵytyndaǵy talaı ıgi isterdiń uıytqysy boldy. Azamattyq aıqyn ustanymymen, qajyrly eńbegimen til jáne termınologııa, mádenıet pen rýhanııat salalarynyń ósip-órkendeýine atsalysty. El-jurttyń qurmetine bólenip, sońyna kóptegen ǵylymı eńbekteri men laıyqty shákirtterin qaldyrdy.

Ómirzaq Aıtbaıulynyń ǵıbratty ǵumyry men jarqyn beınesi jurtshylyq jadynda árdaıym saqtalady dep senemin», - delingen jedelhatta.