Elbasy «Qashaǵannyń» alǵashqy munaıyn mańdaıyna jaqqan bala: Sol sát bolashaǵymdy aıqyndady

ASTANA. QazAqparat - Osydan 18 jyl buryn QR Prezıdenti Nursultan Nazarbaev «Qashaǵan» ken ornynyń alǵashqy munaıyn mańdaıyna jaqqan Berik Ýap búgingi tańda sol ken ornynda ınjener-munaıshy bolyp eńbek etip júr. «Jas Otan» Jastar qanatynyń kezekti IV seziniń qorytyndy kúninde uıymdastyrylǵan «Jańa álemge jol salamyz» atty Gala-forýmda Berik Ýap sóz sóılep, 18 jyl burynǵy sát óziniń bolashaǵyn aıqyndap bergenin aıtty, dep habarlaıdy «QazAqparat» HAA tilshisi.

«Men, Ýap Berik Sársenbaıuly elimizdegi ǵasyrdan astam tarıhy bar munaı-gaz salasynyń jas ókilimin. Meniń taǵdyrym osy búldirshin kezimnen bastap munaı salasymen tyǵyz baılanysty. Sebebi, osydan 18 jyl buryn «Qashaǵan» munaı ken ornynyń alǵashqy munaıyn Elbasymyz Nursultan Ábishuly «Qazaqstannyń bolashaǵy úshin» dep, meniń mańdaıyma jaqqan bolatyn. Sol sát meniń bolashaǵymdy aıqyndap berdi desem de bolady», - deıdi jas jigit.

Ol sol kezde munaı-gaz salasynyń bilgir mamany bolý baǵytyndaǵy alǵashqy armany paıda bolǵanyn aıtady.

«Prezıdentimiz elimizdiń qazba baılyqtaryn zamanaýı tehnologııalarmen ıgerip, álemde terezesi teń qatynas jasaý úshin árbirimiz tereń bilimge umtylýymyz kerektigin aıtyp júredi. Men de óz armanymnyń kilti osy tereń bilimde ekenin túsindim. Sol sebepti, 2010 jyly Atyraý qalasyndaǵy daryndy balalarǵa arnalǵan mektep-lıtseıin úzdik bitirip, qııalyma qanat bitip, Ulybrıtanııa elindegi Manchester ýnıversıtetiniń oqý grantyna ıe boldym. Óz jerimnen shette júrgen jyldary qazaqstandyq jastardyń basyn biriktirý maqsatynda stýdenttik uıymnyń qataryna enip, keıin sol uıymda jetekshi atandym. Odan keıingi jyldary bilimimdi odan ary jetildirý maqsatynda Ulybrıtanııanyń eń úzdik ýnıversıtetteriniń biri Heriot-Watt-ta oqyp, munaı-gazynyń magıstri atandym», - deıdi ol.

Berik Ýap qazirgi tańda sol «Qashaǵan» ken ornyn ıgeretin kompanııada jas maman bolyp jumys atqaratynyn jetkizdi.

«Keı kezderi óz taǵdyrymdy el taǵdyrymen ushtastyramyn. Sebebi, Táýelsiz Qazaqstanymyzdyń qalyptasýyna jáne órkendep damýyna Elbasymyz zor úles qosty. Biz de solaı eńbek etýimiz kerek. Bul týraly oı men úshin ótken jyly ǵana jaryq kórgen «Táýelsizdik dáýiri» atty kitabyn oqý barysynda keldi. Bul kitap - Táýelsizdikten keıingi qıyn-qystaý zamannan bastap qazirgi biz kórip otyrǵan qazirgi Qazaqstannyń árbir kezeńin tolyqtaı saralaǵan elimizdiń bir shejiresi», - dedi ol.

Berik Ýap eger árbir jas býyn bilimge degen qushtarlyǵyn eseleı berse, elimiz álemdik qaýymdastyqta qadamyn nyq basqan memleket bolyp alǵa jyljı beretinine senetinin bildirdi.

«Jasotandyq dostaryma «Táýelsizdik dáýiri» kitabyn oqýǵa keńes berer edim. Oqysańyz, bilimge degen qushtarlyǵyńyz arta túsedi. Sózimdi qorytyndylaı kele, Elbasymyz aıtqandaı «Búginginiń adamy bilimi jetik, jańa tehnologııalardy meńgergen, jan-jaqty bolýy kerek». Sondaı tulǵa bolyp qalyptasýymyzǵa búgingi tańda barlyq jaǵdaı jasalyp jatyr», - dep túıdi Berik Ýap.

Foto: Qanat ELEÝOV pen Berik Ýap muraǵatynan