Elbasy Irannyń Syrtqy ister mınıstrimen kezdesti

ASTANA. QazAqparat - Táýelsizdik saraıynda Qazaqstan Prezıdenti Iran Islam Respýblıkasynyń Syrtqy ister mınıstri Mohammad-Djavad Zarıfpen kezdesti, dep habarlaıdy Aqordanyń baspasóz qyzmeti.

Memleket basshysy kezdesýde Syrtqy ister mınıstrine Shanhaı yntymaqtastyq uıymyna múshe memleketter basshylarynyń keńesine jáne «EKSPO-2017» halyqaralyq kórmesiniń ashylýyna qatysýǵa kelgeni úshin alǵys aıtty.
Nursultan Nazarbaev Iranda ótken saılaýda qazirgi Prezıdent H.Rýhanıdiń jeńiske jetkeni týraly habardy rızashylyqpen qabyldaǵanyn atap ótti.
- Meni ıslam áleminde oryn alyp otyrǵan qarama-qaıshylyqtar qatty alańdatady. Ózara túsinistik pen senim tezirek ornaıdy dep úmittenemin, - dedi Nursultan Nazarbaev.
Syrtqy ister mınıstri Qazaqstan Prezıdentine qonaqjaılyq kórsetkeni úshin rızashylyǵyn bildirdi.
- Elderimiz arasyndaǵy qarym-qatynastar joǵary deńgeıde. Sizdiń jáne Iran Prezıdentiniń ózara saparlaryńyzdyń arqasynda olar qarqyndy damýda, - dedi M.Zarıf.
Sondaı-aq, M.Zarıf Qazaqstannyń BUU Qaýipsizdik Keńesiniń turaqty emes múshesi bolyp saılanýymen quttyqtady.

Foto: Aqordanyń baspasóz qyzmeti