Elbasy ınvestıtsııa tartýǵa qatysty: Bárin Atamqulovqa artyp qoımańdar
«Indýstrııalandyrýdyń ekinshi besjyldyǵy shegine jetip keledi. 1250 jobanyń elimizdegi ónerkásipti damytýda mańyzdy ról atqarǵanyn bilesizder. Eldiń úshinshi jańǵyrýy úshin jyl saıyn jalpy ishki ónimniń 30 paıyzyn negizgi kapıtalǵa ınvestıtsııalaýymyz kerek. Sońǵy jyldary bizde bul kórsetkish 20 paıyzdyń mańynda bolyp qaldy. JІÓ-degi nesıeniń úlesi de tómen - 25 paıyz deńgeıinde qalyp otyr. Grýzııada bul kórsetkish 58 paıyzǵa, Reseıde 53 paıyzǵa teń bolsa, bizde bar-joǵy - 25 paıyz. Bul jerde másele naqty sektorǵa salynǵan ınvestıtsııanyń azdyǵynda. Ulttyq bank bul rette belsendilik tanytyp, eń aldymen ekonomıkalyq ósimge atsalysýy kerek», - dedi Prezıdent Úkimettiń keńeıtilgen otyrysynda.
Memleket basshysy Premer-mınıstr Baqytjan Saǵyntaev men Ulttyq bank tóraǵasy Aqyshevqa naqty sektordaǵy ınfraqurylymdyq jobalardy qarjylandyrýda júıeli sheshim tabýdy tapsyrdy.
«Ár ýaqytta kelise jumys isteýdiń jetispeı jatqany baıqalady. Sender ártúrli Úkimette jumys isteısińder me, álde bir eldiń ishinde jumys atqarasyńdar ma? Aınalaǵa «óz isimdi qatyrsam boldy, basqalarda sharýam joq» degen ustanymmen qaraýdy qoıý kerek. Sol sebepti, máseleni naqty kelisilgen jumys arqyly sheshken jón. Álemde ınvestıtsııalar úshin qyzý báseke qalyptasqan. Sol sebepti, damyǵan elderdiń ınvestorlaryna basa mańyz bere otyryp, ınvestıtsııa tartýdyń keshendi ekojúıesin qalyptastyrý mindeti qoıylyp otyr», - dedi Prezıdent.
Memleket basshysy óz sózinde Syrtqy ister mınıstri qyzmetindegi Beıbit Atamqulovqa mekemelerden ákimdikke deıingi jumysty úılestirý mindeti berilip otyrǵanyn atap ótti.
«Biraq, bul jumyspen tek sol ǵana (Atamqulov - avt.) aınalysýy kerek dep oılap qalmańdar. Bul - búkil Úkimettiń ortaq mindeti. Al ol óz múmkindikterin elshilikter arqyly qoldanady. Bári de jumys isteýi kerek», - dedi Nursultan Nazarbaev.