Elbasy elordada EQYU sammıti sııaqty konferentsııa ótkizýdi usyndy

ASTANA. QazAqparat - Helsınkı qorytyndy aktisiniń 45 jyldyǵyna oraı  2020 jyly qaýipsizdik jáne yntymaqtastyq jónindegi konferentsııa ótkizý qajet. Bul týraly búgin elordada ótip jatqan Astana klýbynyń jalpy otyrysynda QR Prezıdenti Nursultan Nazarbaev aıtty, dep habarlaıdy QazAqparat tilshisi.

QR Prezıdentiniń paıymynsha, qyrǵy-qabaq soǵys naǵyz qyzǵan kezde, 1975 jyly jasalǵan aktini jańartatyn ýaqyt kelip jetti.

«Osyǵan oraı atalǵan strategııalyq qujattyń qabyldanýynyń 45 jyldyǵyna oraı 2020 jyly qaýipsizdik jáne yntymaqtastyq jónindegi soǵan bara-bar konferentsııa ótkizýdi usynamyn. Jańa kelisim jasasý protsesiniń ońaı bolmaıtyndyǵyn túsinemiz. Degenmen, keıbir uly derjavalar kópjaqty formatta emes, ekijaqty tártippen jumy istegen ıgilikti dep sanaıdy. Sondyqtan da qorytyndy kelissózderge daıyndyq 2019 jyldan bastalǵany durys bolar edi», - dedi Nursultan Nazarbaev.

Elbasy Qazaqstan aldaǵy ýaqytta mundaı konferentsııa ótkizýge daıyn ekendigin jáne elordada EQYU sammıtin ótkizý arqyly tájirıbe jınaǵanyn eske saldy.

«Bul iste kóp jaıt álemdik derjavalardyń ustanymyna baılanysty bolary sózsiz. Osyǵan oraı  álemdik derjavalardy jańa kelisim jasaý boıynsha birlesip áreket etýge shaqyrǵym keledi», - dedi Elbasy. 

Aıta keteıik, Elbasy jıyn barysynda Úlken Eýrazııanyń sulbasy qalyptasyp kele jatqanyn aıtyp, Reseı, AQSh jáne Qytaı arasyndaǵy geosaıası básekelestikke alańdaýshylyq tanytty.

Sonymen qatar Nursultan Nazarbaev álemdik derjavalar qarýlaný jarysyna qaıta oralýy múmkin ekendigin eskertti.

Kıbertehnıka ıadrolyq jáne ózge de strategııalyq nysandarǵa qaýip tóndiretinin basa aıtty.