Elbasy elge oralmaq qandastardy qujattarmen júgirtpeýdi tapsyrdy

ASTANA. QazAqparat - QR Prezıdenti Nursultan Nazarbaev Dúnıejúzi qazaqtarynyń quryltaıy barysynda QR Syrtqy ister mınıstrligine jáne Úkimetke shetelden Atajurtqa oralýǵa nıettengen qazaqtarǵa qujat jınatyp, shekarada shyrǵalań týǵyzbaýdy tapsyrdy, dep habarlaıdy QazAqparat.

«Elim, jerim dep eńiregen árbir qazaqqa Qazaqstannyń esigi árqashan ashyq, aıqara ashyq. Eshkimge shekteý joq. Jaǵdaı bar, elime kelemin degenderge qaýymdastyq arqyly barlyq jaǵdaıdy jasaýymyz kerek. Biz kóship kelýge nıet etken aǵaıynǵa jol silteýdi turǵylyqty jerinen bastaýymyz kerek. Bizdiń barlyq elderde Elshilikterimiz bar. Sol Elshilikter azamattardyń qujattaryn qamdap, qonystanatyn jeri týraly keńes berýi tıis. Osynda otyrǵan Syrtqy ister mınıstrine tapsyramyn. Kelemin degender shekarada ylǵı shyrǵalań bolyp turady. Elge kelgennen soń, qujat túgendeý úshin ary-beri sarylý bolmaýy kerek. Qytaı qazaqtarynyń sottalǵany nemese sottalmaǵany týraly anyqtama alý jaıy aǵaıynǵa problemalar týǵyzady. Ony shekara turǵysynan sol jerde anyqtap, elmenen aqyldasyp, kelisip, sheshý kerek. Úkimetke osynyń barlyǵyn keshendi túrde qaıta qarap, sheshimin tabýdy tapsyramyn», - dedi Prezıdent Quryltaıdyń ashylý saltanatynda.

Aıta keteıik, Astana qalasynda Dúnıejúzi qazaqtarynyń V quryltaıy óz jumysyn bastaǵan bolatyn. Quryltaı jumysyna barlyǵy 800 delegat pen qonaq qatysýda, onyń 350 adamy alys jáne jaqyn sheteldegi 39 memleketten keldi. Bul - ǵylymı-shyǵarmashylyq jáne pedagogıkalyq zııalylar ókilderi, bıznes, sport, buqaralyq aqparat quraldary salalarynyń mamandary, memlekettik jáne qoǵamdyq uıymdardyń qyzmetkerleri. Quryltaı delegattary men qonaqtarynyń 80 paıyzy mundaı is-sharaǵa alǵash ret qatysýda.

Dúnıejúzi qazaqtary quryltaıynyń baspasóz ortalyǵynda 150 otandyq jáne sheteldik BAQ ókilderi aqparat taratady.

1992 jyldan beri ótkizilip kele jatqan Quryltaı dúnıejúziniń túkpir-túkpirinde turatyn etnıkalyq qazaqtardyń kezdesý orny ári biregeı suhbat alańy bolyp tabylady.