Elbasy eki balany órtten qutqarǵan Ǵalymjan Áleýhanovqa memlekettik nagrada tabystady

ASTANA. QazAqparat - Búgin Aqordada birqatar tulǵalarǵa joǵary áskerı jáne arnaýly ataqtar, synyptyq shender jáne biliktilik synybyn tabystaǵan Elbasy Nursultan Nazarbaev eki balany órtten qutqarǵan Ǵalymjan Áleýhanovqa memlekettik nagrada berdi, dep habarlaıdy QazAqparat tilshisi.

«Qoǵamdyq tártipti jáne qaýipsizdikti nyǵaıtýǵa zor úles qosqan Dýlat Qurmashevti erekshe atap ótkim keledi. Asa qaýipti qylmyskerlerge qarsy arnaıy operatsııa basqaryp ótkizgen ol birinshi dárejeli «Aıbyn» ordenine laıyq dep sanadyq», - dep atap ótti Elbasy.

Sonymen qatar memleket basshysy birinshi dárejeli «Aıbyn» ordenin Ulttyq qaýipsizdik komıtetiniń departament basshysy Ashat Tóleýovke tabystady.

«Qyzmetin minsiz atqaryp, áskerı bilimge bilikti basshylyq jasaǵany úshin Jasulan Jaqypovqa ekinshi dárejeli «Aıbyn» ordeni beriledi. Bıyl qurlyq áskerleri arasynda ótken komandalyq daıyndyq nátıjesi boıynsha ol birinshi orynǵa ıe boldy», - dedi QR Prezıdenti.

Dál osyndaı ordendi Memleket basshysy Memlekettik kúzet qyzmetiniń apparat basshysy Andreı Kalının men Ulttyq qaýipsizdik komıteti departamenti bastyǵynyń orynbasary Dmıtrıı Plastovetske berdi.

«Beıbit kúnde basyn qaterge tigip, eki balany órtten qutqarǵan Ǵalymjan Áleýhanov eren erlik kórsetti. Onyń bul isi barsha jurtqa úlgi. Sol sebepti «Erligi úshin» medalimen marapattalady», - dedi Elbasy.

Nursultan Nazarbaev órtten eki balany qutqaryp qalǵan QR ІІM Qaraǵandy oblystyq tótenshe jaǵdaılar departamentiniń bólimshe komandıri Vıtalıı Kalmykovty «Erligi úshin» medalimen marapattady.

«Áskerı qyzmette kásibı biliktilik tanytqan Nurlan Zalmuqanov «Jaýyngerlik erligi úshin» medalimen marapattalady. Ol áskerı ushaqtyń apatqa ushyraýyn boldyrmaı batyl qımyldap adam ómirin saqtap qaldy», - dedi Memleket basshysy.