Elbasy EAEQ elderindegi qazaqstandyqtardyń quqyǵyn qorǵaıtyn Zańǵa qol qoıdy

ASTANA. QazAqparat - Elbasy Nursultan Nazarbaev Eýrazııalyq ekonomıkalyq qoǵamdastyqqa múshe memleketterdiń azamattary ekinshi memlekettiń aýmaǵynda óndiriste zardap shekken jaǵdaıda, oqıǵany tergep-tekserýdiń tártibi týraly Zańǵa qol qoıdy, dep habarlaıdy QazAqparat Aqordaǵa silteme jasap.

Atap aıtqanda, Prezıdent «Eýrazııalyq ekonomıkalyq qoǵamdastyqqa múshe bir memlekettiń azamattary Eýrazııalyq ekonomıkalyq qoǵamdastyqqa múshe ekinshi memlekettiń aýmaǵynda eńbek qyzmetin júzege asyrý kezinde ushyraǵan óndiristegi jazataıym oqıǵalardy tergep-tekserý tártibi týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy.

Zańnyń mátini baspasózde jarııalanady.

Eske salaıyq, atalmysh Kelisim jazataıym oqıǵa saldarynan zardap shekken Eýrazııalyq ekonomıkalyq qoǵamdastyqqa múshe memleketter azamattarynyń eńbek quqyqtaryn qorǵaýǵa baǵyttalǵan.

Zańnyń jobasyn bıylǵy 27 qyrkúıekte Parlament Senatynda Eńbek jáne halyqty áleýmettik qorǵaý mınıstri Mádına Ábilqasymova tanystyrǵan bolatyn.

«Kelisim óz betinshe jumysqa ornalasqandar, sondaı-aq kásiporyndar jumysqa alǵan azamattardyń jazataıym oqıǵalarǵa ushyraýyn tekserý tártibin bekitýge arnalǵan. Jalpy alǵanda, qujatpen Eýrazııalyq ekonomıkalyq qoǵamdastyqqa múshe bir memlekettiń azamattarymen basqa memlekettiń aýmaǵynda eńbek qyzmetin júzege asyrǵanda bolǵan óndiristegi jazataıym oqıǵalar týraly aqparattyń ashyqtyǵy men qoljetimdiligi meseleleri retteledi», - dedi Mádına Ábilqasymova.

Sonymen qatar, Kelisimde qatysýshy elder úshin óndiristegi jazataıym oqıǵa týraly aktiniń biryńǵaı formasy bekitiledi (№ N-1E). Oqıǵany tekserý aıaqtalǵannan keıin, jumys berýshi zardap shekken qyzmetkerge jazataıym oqıǵa týraly aktini berýge mindetti.  Al aktiniń bir danasy jumysqa ornalastyrýshy memlekettiń eńbek ınspektsııasyna joldanady.

«Toptyq, aýyr nemese adam ólimine ákep soqqan jazataıym oqıǵalardy tekserý aıaqtalǵannan keıin, aktini tekserý materıaldarymen birge zardap shegýshi azamattyń turatyn memleketiniń ýákiletti organyna joldanady. Munymen qosa, jazataıym oqıǵany tekserýge baılanysty berilgen qujattar nemese ekinshi qatysýshy eldiń bireýiniń aýmaǵynda jasalǵan qujattardyń kóshirmelerin Qoǵamdastyqtyń basqa elderi legalızatsııalaýsyz qabyldaıdy. Osyǵan baılanysty jumyskerge qujattardy zańdastyrý qajet bolmaıdy», - degen bolatyn mınıstr.

Osylaısha, zadap shekken azamattardyń densaýlyǵyna kelgen zaqymdy óteý jáne óndiristegi jazataıym oqıǵamen baılanysty ótemaqy tólemderin alý protsesin birshama jeńildetedi.

Sonymen qatar, jumysshynyń densaýlyǵyna kelgen zııandy óteý jumysqa ornalastyrǵan memlekettiń zańnamasyna sáıkes júrgiziledi.