Elbasy durys tańdaý jasady - Vladımır Bojko Prezıdentti ulyqtaý jaıly
«Qasym-Jomart Toqaevtyń sózinen keıingi alǵashqy áserdi aıtar bolsaq, aldymen ornyqtylyqty, óz baǵdarlamasynda atalǵan barlyq bastamalardyń ólshene aıtylǵanyn ańǵardym. Jarııalaǵan baǵdarlama óte tereń ári eń bastysy beıbitshilik pen kelisimdi saqtaýǵa, Otanymyzdy gúldendirip, árbir azamattyń ómirin jaqsartýǵa baǵyttalyp otyr. Prezıdent búkil qoǵamnyń dıalogyn qoldaıdy», - dedi Vladımır Bojko Prezıdentti ulyqtaý rásiminen keıin.
Onyń paıymyna qaraǵanda, Qasym-Jomart Toqaevty tańdaý - óte durys sheshim bolǵan.
«Eń bastysy, Elbasy óte durys sheshim jasady. Zańdy turǵyda Konstıtýtsııaǵa súıene otyryp, bılikti bergen kezde halyqtan bul bastama qoldaý tapty. Nátıjeni qarańyz. Bizdiń halqymyz el ómirinde eń aldymen beıbitshilik, kelisim men turaqtylyq bolýy kerektigin jaqsy túsinip otyr. Osy negizde ǵana ǵylymdy, ekonomıkany damytyp, medıtsına men bilimge tór berýge bolady. Osy joldan taımasaq, budan da joǵary deńgeıde ilgerileıtinimiz anyq. Sol sebepti, turaqtylyq ornaǵan elimiz úshin bárimiz qýanýymyz kerek. Ár azamattyń múddesi eskerilip, qazaqstandyqtar ómiriniń jaqsara túskenin seze túseri anyq», - dedi spıker.
Bojko óz halyqpen jaqyndasý týraly Qasym-Jomart Toqaevtyń halyqpen jaqyndasý týraly bastamasyna qoldaý bildiretinin jetkizdi.
«Basty másele - qoǵammen dıalog qurý. Óz azamattarymyzdyń únin tyńdaı bilýimiz kerek. Keri baılanys bolmaǵan jaǵdaıda kez kelgen júıede másele týyndaıdy. Prezıdent mańyzdy máseleni atap ótti: qoǵamdy tyńdap, máselelerdi bilý kerek. Memlekettiń quraldaryn paıdalana otyryp, azamattardyń problemasyn sheshýge umtylǵan durys», - dedi Vladımır Bojko.
Aıta ketsek, elordada jańadan saılanǵan QR Prezıdenti Qasym-Jomart Toqaevty ulyqtaý rásimi ótti. Q. Toqaevty ulyqtaý rásimine Úkimet músheleri, Parlament depýtattary, Konstıtýtsııalyq Keńes músheleri, Joǵarǵy Sot sýdıalary, Qazaqstanda tirkelgen dıplomatııalyq korpýs ókilderi jáne basqa da shaqyrylǵan qonaqtar qatysty.
Táýelsizdik saraıynda Qasym-Jomart Toqaev Qazaqstan halqyna ant berdi. Ant bergen sátten bastap jańadan saılanǵan Prezıdent resmı qyzmetine kirisken bolyp sanalady.