Elbasy «Dala folklory men mýzykasynyń myń jyly» jobasyn usyndy
Maqalada Qazaqstan Prezıdenti «Dala folklory men mýzykasynyń myń jyly» jobasy aıasynda «Dala folklorynyń antologııasyn» jasaý kerektigin atap ótedi.
«Munda Uly dala muragerleriniń ótken myńjyldyqtaǵy halyq aýyz ádebıetiniń tańdaýly úlgileri - ertegileri, ańyz-áfsanalary, qıssalary men epostary jınaqtalady. Sonymen qatar, qazaqtyń qobyz, dombyra, sybyzǵy, sazsyrnaı jáne basqa da dástúrli mýzykalyq aspaptarymen oryndaýǵa arnalǵan mańyzdy týyndylar toptamasyn - «Uly dalanyń kóne saryndary» jınaǵyn basyp shyǵarý qajet», - deıdi Elbasy.
QR Prezıdentiniń paıymynsha, Uly Dalanyń folklory men áýenderi zamanaýı tsıfrlyq formatta «jańa tynys» alýǵa tıis. Bul jobalardy júzege asyrý úshin kóshpendilerdiń baı murasyn júıeleýge qabiletti ǵana emes, sondaı-aq, onyń ózektiligin arttyra alatyn otandyq jáne sheteldik kásibı mamandardy tartý mańyzdy.
«Bizdiń mádenıetimizdiń negizgi sıýjetterinde, keıipkerleri men saryndarynda shekara bolmaıdy, sol sebepti ony júıeli zerttep, búkil Ortalyq Eýrazııa keńistigi men barsha álemde dáripteýge tıispiz. Aýyzsha jáne mýzykalyq dástúrdi jańǵyrtý qazirgi zamanǵy aýdıtorııaǵa jaqyn ári túsinikti formatta bolýy kerek», - dep jazady Nursultan Nazarbaev.
Osy oraıda QR Prezıdenti kónergen sózder men mátinderdi sýretterimen qosa berýge, aıqyn vıdeomaterıaldar formasynda usynýǵa bolatyndyǵyna nazar aýdartady. Mýzykalyq dybystar men áýender tabıǵı aspaptarmen ǵana emes, olardyń zamanaýı elektrondy nusqalary arqyly da shyǵarylatyndyǵyn atap ótedi.
«Sonymen qatar, folklorlyq dástúrdiń ortaq tarıhı negizderin izdeý úshin Qazaqstannyń túrli óńirleri men ózge elderge birneshe izdeý-zertteý ekspedıtsııalaryn uıymdastyrý qajet», - deıdi Memleket basshysy.
Aıta keteıik, Prezıdent atalmysh maqalasynda «Uly dala» atty ejelgi óner jáne tehnologııalar mýzeıin ashýdy usynǵan bolatyn. Sondaı-aq, 2019 jyly Astanada Túrkologtardyń dúnıejúzilik kongresin jáne ártúrli elder mýzeıleriniń ekspozıtsııalaryna ejelgi túrki jádigerleri qoıylatyn Túrki halyqtarynyń mádenı kúnderin uıymdastyrý kerektigin aıtty.