Elbasy BUU Qaýipsizdik Keńesine tóraǵalyq jaıynda: Qazaq degen halyq bolmasa osy jerde otyrmas edik

NЬıÝ-IORK. QazAqparat - Búgin AQSh-qa resmı saparyn qorytyndylap, qazaqstandyq jáne sheteldik BAQ ókilderine suhbat bergen Elbasy Nursultan Nazarbaev Qazaqstannyń BUU Qaýipsizdik Keńesine tóraǵalyǵyna qatysty pikir bildirdi, dep habarlaıdy QazAqparat.

«Tarıh úshin 26 jyl qas-qaǵym sát. Osy jyldardyń ishinde bizdiń elimiz aıtarlyqtaı tabystarǵa jetti. Ár ýaqytta, osyndaı kezeńderde meniń esimde ylǵı halqym, qazaǵymyz turady. Qazaq degen halyq bolmasa, biz - qazaqtar osy jerde qalqıyp otyrmas edik. Polshanyń óziniń, orystyń óziniń, nemistiń óziniń prezıdenti bar. Halqymyzdyń aýyzbirligi, alǵa qaraı umtylýy, jaqsylyqqa degen umtylysy osyndaı dárejege jetkizedi. Artyńda sondaı halyq turǵanda eshteńeden saspaı jumys isteısiń», - dedi QR Prezıdenti.

Nursultan Nazarbaev BUU Qaýipsizdik Keńesiniń tóraǵasy retinde «Jappaı qyryp-joıatyn qarýdy taratpaý: senim sharalary» atty otyrysyna basshylyq jasaǵanda tolqyǵanyn da jasyrmady.

«Árıne, jańaǵy jerde otyrǵanda tolqısyń. Qaı kezde qazaqtyń balasy búkil álemge osy jerden aqyl aıtyp edi? Búkil álemde, dúnıejúzinde 200 memleket bar. 200 memlekettiń ishinde osy Qaýipsizdik Keńesin basqarǵandar kóp emes, 70-80-ge jaqyndaǵan da joq. Biz óńirden eń birinshi bolyp osyndaı dárejege jettik. Ózimizdiń kóńilimizdi aıtyp qana qoımaı, sózimizdi ótkizip kelemiz. Senim máselesin aıttym, úlken elderdiń arasynda senim joq», - dedi Elbasy.

Memleket basshysy BUU-nyń bas hatshysymen kezdeskenin, ol da Ýkraına, Soltústik Koreıa, Iran problemalarynda Qazaqstannan kómek suraǵandaı bolǵanyn atap ótti.

«Munyń barlyǵy eldiń abyroıy, elge degen senim. Senim bolsa elge qarajat ta, tehnologııalar da keledi», - dep túsindedi sózin Nursultan Nazarbaev.