Elbasy birqatar ekijaqty kezdesýler ótkizdi

ASTANA. QazAqparat - Qazaqstan Prezıdenti Nursultan Nazarbaev Eýropa qaıta qurý jáne damý bankiniń prezıdenti Sýma Chakrabartımen kezdesti, dep habarlaıdy Aqordanyń baspasóz qyzmeti.

Kezdesý Sheteldik ınvestorlar keńesiniń 31-plenarlyq otyrysy bastalar aldynda ótti. Kelissóz barysynda taraptar ınvestıtsııalyq yntymaqtastyq jáne birlesken jobalardy júzege asyrýdyń perspektıvalary jónindegi máselelerdi talqylady.

Memleket basshysy Sheteldik ınvestorlar keńesiniń jumysyna qatysqany úshin Sýma Chakrabartıge rızashylyq bildirip, osyndaı eki jaqty kezdesýdiń dástúrli sıpat alǵanyn aıtty.

Qazaqstan Prezıdenti qazirgi ýaqytta elimizde birlesken ınfraqurylymdyq jobalardyń júzege asyrylyp jatqanyn atap ótti.

«Osy jyldar ishinde Qazaqstanǵa 7 mıllıard dollardan astam ınvestıtsııa tartyldy. Qazir sizder Qazaqstanmen yntymaqtastyqtyń elaralyq baǵdarlamasyn qabyldadyńyzdar. Іri ınfraqurylymdyq baǵdarlamalar iske asyrylýda. Shaǵyn jáne orta bıznestiń damýyna jol ashyp, agrarlyq keshendi qoldaý isi ózekti bolyp qala beredi», - dedi Nursultan Nazarbaev.

S.Chakrabartı Qazaqstanda ınvestıtsııalyq belsendilikti yntalandyrý úderisindegi Sheteldik ınvestorlar keńesi basqosýlarynyń tıimdiligi men mańyzdylyǵy jáne memleket pen bıznes arasyndaǵy syndarly dıalogtyń damýy jóninde aıtty. 

Sondaı-aq, Elbasy «Royal Dutch Shell» kontserniniń bas atqarýshy dırektory Ben van Berdenmen kezdesti.

Kezdesý Sheteldik ınvestorlar keńesiniń plenarlyq otyrysy aıaqtalǵannan keıin ótti.

Kelissóz barysynda taraptar ózara yntymaqtastyqty keńeıtý jáne strategııalyq áriptestikti damytý jónindegi ózekti máselelerdi talqylady.