Elbasy bankter máselesine qatysty pikir bildirdi
«Biz muny qashan aıaqtaımyz? Ábilıazov bastaǵan BTA banki memleket pen halyqtyń aqshasyn barlyǵynyń kóz aldynda jappaı urlady. Búkil álemge biz muny ashyp kórsetip, memleket aqshasyn urlaý ekendigin dáleldedik. Al qazir she? Bank qurdyq jáne endi oǵan adamdar, ulttyq kompanııalar bara bastady. Aktsıonerler ol jaqtan aqshany shyǵaryp jatyr. Ulttyq bank bolsa, muny baqylap qana otyr. Buǵan qalaı jol berýge bolady? Bizge qadaǵalaýshy organ ne úshin qajet? Barlyq bankte osyndaı... Bul meniń ashýymdy týdyrady», - dedi Elbasy.
Memleket basshysy osy kúnge deıin Úkimettiń bankterdiń bankrot bolýyna jol bermeı kelgendigin atap ótti.
«Bankrot qylý kerek jáne de aqshany qaldyrsyn. Ol aktsıonerler eshqaıda ketken joq, osynda otyr. Bankterdi aqshany jınap, odan keıin shyǵaryp alý úshin qurǵan. Tapa tal túste qalaı urlyq jasaýǵa bolady», - dedi Nursultan Nazarbaev.
Májilis barysynda Ulttyq bank tóraǵasy Danııar Aqyshev 2008-2009 jyldarda oryn alǵan daǵdarys kezinde týyndaǵan bank sektoryndaǵy problemalardyń ótken jyly baıaý sheshilgenin atap ótti. Onyń aıtýynsha, bankterdiń problemasyn shynaıy moıyndaýdyń ornyna olarǵa restrýktýrızatsııalaý júrgizilip, jekelegen kredıtter shyǵynǵa jatqyzylǵan.
«Buǵan qosa, naryqtyń keıbir qatysýshylary aktsıonerlermen jáne menedjerlermen baılanysy bar tulǵalardy kredıtteý bóliginde táýekeldi saıasat júrgizýin jalǵastyra berdi. Degenmen, 2000 jyldary mundaı qyzmet sheteldik zaem qarajat esebinen qarjylandyrylyp ketsek, sońǵy jyldary memleket qarajaty esebinen qarjylandyrylýda. Qazirgi ýaqytta memlekettik holdıngter men kvazımemlekettik kompanııalardyń banktegi esep-shottarynda 7,2 trıllıonnan astam teńge bar», - dedi bank basshysy.