Elbasy aıtqan eldiktiń sózi ýaqyt talabymen úndesedi - Ýálıhan Ibraev

QYZYLORDA. QazAqparat - Táýelsizdigin shırek ǵasyr ǵana buryn alǵan elimiz búginde saıası jáne ekonomıkalyq jańǵyrýlardy tıimdi júzege asyryp keledi. Biraq álemdik jahandaný úderisi kezinde ekonomıkalyq ál-aýqat qana emes, sonymen qatar, rýhanı jańǵyrý men ulttyq sana da básekege túsetin ýaqyt. Osy tusta Ult Kóshbasshysynyń «Bolashaqqa baǵdar: rýhanı jańǵyrý» atty maqalasy ýaqyt talabynan týyndaǵan dúnıe dep bilemin, deıdi oblystyq «Qoǵamdyq kelisim» KMM-niń dırektory, tarıh ǵylymdarynyń kandıdaty Ýálıhan Ibraev.

 «Memleket basshysy dál kórsetkendeı, jańa turpatty jańǵyrýdyń eń basty sharty - ulttyq kodymyzdy aıqyndaý men ony saqtaı bilý bolmaq. ıAǵnı, álemdik keńistikte ultymyzdyń tabysty bolýy onyń tabıǵı baılyǵymen emes, adamdarynyń básekelik qabiletimen aıqyndalady», - deıdi ol.

Onyń aıtýynsha, árbir qazaqstandyq, sol arqyly tutas ult HHІ ǵasyrǵa laıyqty qasıetterge ıe bolýy kerek. Ol - kompıýterlik saýattylyq, shet tilderin bilý, mádenı ashyqtyq jáne taǵy basqalary

 «Ultymyzdyń ózindik kodyn saqtap qalý úshin Elbasy «ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis», - dep atap ótti. Sonymen birge, meılinshe kónergen, jahandyq álemmen qabyspaıtyn keıbir daǵdylar men ádetterden arylýymyz da kerek. Ol jershildik jáne rýshyldyq ekeni belgili. Elimizdiń básekege qabiletti ozyq 30 memleketiniń qataryna qosylý úshin ultymyzdyń damýyna kedergi bolatyn ótkenniń kertartpa tustarynan bas tartýymyz ýaqyttyń talaby. «Elbasynyń «Bolashaqqa baǵdar: rýhanı jańǵyrý» atty maqalasy halyqtyń kókeıinde júrgen saýaldarǵa naqty ári utymdy usynystar men jaýaptar dep bilemin», - dep oıyn túıindedi Ý. Ibraev.