Elbasy: Aýyl sharýashylyǵyna qajettini salalyq úsh JOO-dan talap etý qajet

QOSTANAI. QazAqparat - Qostanaıǵa ekikúndik jumys saparymen kelgen Elbasy Nursultan Nazarbaev aýylsharýashylyq taýar óndirýshilerimen ótken kezdesýde kólik ınfraqurylymyn, sondaı-aq aýyl sharýashylyǵyn damytý máselelerine toqtaldy, dep habarlaıdy «QazAqparat» HAA tilshisi.

Memleket basshysy atap ótkendeı, eldegi jol júıesiniń damýy zamanaýı kólik ınfraqurylymyn jasaqtaýǵa septigin tıgizedi.

«Jol - ómir súrýdiń ózegi. Biz zamanaýı talaptarǵa jaýap beretin, tózimdi tas jolyn salý arqyly ekonomıkamyzdy ilgerilete alamyz. Bizdiń ishki ónimderge degen suranys artady. Osylaısha, álemdik básekelestikke shyǵamyz», - dedi Elbasy.

Prezıdent sondaı-aq aýyl sharýashylyǵynda ǵylymdy belsendi paıdalaný qajettigin atap ótti.

«Aýyl sharýashylyǵynda ǵylymnyń atqaratyn róli zor. Ǵylymdaǵy jetistikterdi ózimizde qodaný arqyly agroónerkásiptik keshendi durys jolǵa qoıýǵa bolady. Qazir Qazaqstanda úsh argarlyq ýnıversıtet bar. Úsheýiniń de baǵyty bir-birine uqsamaıdy. Mine, aýyl sharýashylyǵyna kerektilerdi osy oqý oryndarynan talap etińizder. Kadr tapshylyǵy bolmaýy qajet» - dedi Nursultan Nazarbaev.

«Altynsarıno» JShS dırektory Borıs Knıazev jergilikti sharýalardyń ǵylymdy ıgerip kele jatqanyn jetkizdi.

«Qarabalyq aýdanynda dıqandar tattanýǵa tózimdi suryppen aınalysýda. Túrli aýrýlarǵa tótep bere alatyn suryp shyǵarý basty talap bolyp otyr. Biz qazir osyndaı suryptardy qoldanyp kelemiz», - dedi Knıazev.

Munan soń, «Lvov» JShS dırektory Andreı Dvýrechenskıı Jitiqara aýdanyndaǵy dán tazartqysh keshen qurylysynyń aıaqtalyp qalǵanyn baıandady. Bul nysandy salýǵa 220 mln teńge jumsaldy.

«Biz sharýashylyqqa nóldik tehnologııany engizdik. Ol bıylǵy qubylmaly aýa raıyna qaramastan 18,8 tsentner astyq alýǵa múmkindik berdi. Bul kórsetkish oblystaǵy ortasha shyǵymdylyqtan 6 tsentnerge artyq», - dedi kásipker.