Elbasy áýelden Táýelsiz Qazaqstannyń basymdyqtaryn durys aıqyndady - Berdibek Saparbaev
«Ótken 30 jylǵa taldaý jasasaq, tarıh úshin asa kóp emes kezeń, biraq soǵan qaramastan birqatar ekonomıkalyq jáne saıası reformalardy sátti ótkizýge múmkin boldy. Sonymen qatar, naryqtyq ekonomıkasy bar memleketti qurý jolynda eleýli tabystarǵa qol jetkize aldyq. Táýelsizdiktiń alǵashqy kúnderinen bastap teńdestirilgen ishki ári syrtqy saıasatty júrgizýde Elbasy basymdyqtardy durys aıqyndaǵanyn atap ótken jón», - dedi mınıstr.
N. Nazarbaev syrtqy saıasatty da salmaqty júrgizgenine toqtalǵan Berdibek Saparbaev, Tuńǵysh Prezıdent Qazaqstannyń ekonomıkalyq jáne geosaıası múddesi negizinde alpaýyt memlekettermen yntymaqtastyq ornatqanyn, sonyń nátıjesinde búginde halyqaralyq arenada elimiz bedeldi rólge ıe bolǵanyn atap ótti.
Onyń aıtýynsha, Táýelsiz Qazaqstannyń tarıhynda Elbasynyń esimi júzege asyrylǵan aýqymdy strategııalyq jobalarmen este qalady. Osy oraıda EQYU Sammıti, «EKSPO-2017» halyqaralyq kórmesi, BUU Qaýipsizdik keńesindegi tóraǵalyq, Sırııadaǵy beıbitshilik úshin kelissózderdi júrgizý jáne basqa da mańyzdy oqıǵalar bar.
«Tuńǵysh Prezıdenttiń mańyzdy jobalarynyń biri jańa elordany kóshirýge, álemdik deńgeıdegi qala qurylysyna da qatysty. Elbasy jańa elordanyń avtory ekeni barshaǵa aıan. Búginde bul shahar XXI ǵasyrdaǵy biregeı ári ásem astanaǵa aınalyp, Táýelsiz Qazaqstannyń sımvoly boldy», - dedi B. Saparbaev.
Eńbek mınıstriniń paıymynsha, N. Nazarbaev aldaǵy ýaqytta da eldiń damýy jolynda óziniń úlesin qosýǵa aıryqsha mán beredi.
«Elbasy halyqtyń ál-aýqatyn arttyrý baǵytyna únemi erekshe nazar aýdarýda. Sondyqtan eń qıyn degen kezeńderdiń ózinde memleket azamattar aldyndaǵy óziniń áleýmettik mindettemelerin árqashan oryndap keldi», - dedi Berdibek Saparbaev.