Elbasy atyna Táýelsizdiktiń 30 jyldyǵyna oraı shet memleket basshylarynan quttyqtaý hattar keldi
Qytaı Halyq Respýblıkasynyń Tóraǵasy Sı Tszınpın Qytaı halqynyń jáne óziniń atynan Elbasyny jáne barsha qazaqstandyqtardy aıtýly merekemen quttyqtap, osy jyldar ishinde Qazaqstannyń Tuńǵysh Prezıdentiniń basshylyǵymen memleketti damytý isinde qol jetkizilgen tabystardy atap ótti.
«Sizdiń kóregen basshylyǵyńyzben Qazaqstan memleket qurý isinde tabysty damý jolyna túsip, zor jetistikterge jetti, Eýrazııa óńirindegi bedeldi memleketke aınaldy. Qytaı muny tatý kórshi ári máńgilik kópjaqty strategııalyq áriptes retinde qýanyshpen qabyldaıdy. Qazaqstannyń 2050 jylǵa deıingi memlekettik damý strategııasyn tabysty júzege asyryp, eldiń áleýetin nyǵaıtýdy jáne halyqtyń ál-aýqatyn arttyrýdy jalǵastyra beretinine senimdimiz», – delingen Sı Tszınpınniń jedelhatynda.
Túrkııa Respýblıkasynyń Prezıdenti Rejep Taııp Erdoǵan Nursultan Nazarbaev pen Qazaqstan halqyna Táýelsizdiktiń otyz jyldyǵyna oraı tynyshtyq pen baq-bereke tilep, jyly lebizin joldady.
Rejep Taııp Erdoǵan Qazaqstan men Túrkııa arasyndaǵy qarym-qatynastyń qarqyndy damýyna toqtala kele, Elbasynyń tikeleı qoldaýymen qurylǵan Túrik memleketteri uıymynyń bıylǵy 12 qarashada Stambýl qalasynda ótken sammıtiniń nátıjelerin atap ótti.
Tájikstan Respýblıkasynyń Prezıdenti Emomalı Rahmon Qazaqstan jetistikteri Nursultan Nazarbaevtyń esimimen tikeleı baılanysty ekenin aıtty.
«Egemendik jyldarynda baýyrlas Qazaqstan bolashaqqa umtylǵan, zamanaýı memleket qurý jolynda tolaǵaı tabystarǵa qol jetkizip, búginde halyqaralyq arenada laıyqty oryn aldy. Qazirgi Qazaqstannyń jetistikteriniń barlyǵy Sizdiń esimińizben jáne Sizdiń Qazaqstan Respýblıkasynyń Tuńǵysh Prezıdenti laýazymyndaǵy kópjyldyq jemisti memlekettik qyzmetińizben tyǵyz baılanysty», – delingen Emomalı Rahmonnyń jedelhatynda.
Qyrǵyz Respýblıkasynyń Prezıdenti Sadyr Japarovtyń hatynda: «Sizdiń Qyrǵyzstan-Qazaqstan arasyndaǵy dostyq pen tatý kórshilikke negizdelgen berik strategııalyq seriktestik jáne odaqtastyq qatynastardy qalyptastyrýǵa qosqan úlesińizdi joǵary baǵalaımyn. Baılanystarymyz aldaǵy ýaqytta da bizdiń elderimizdiń ıgiligi jolynda úzdiksiz damyp, tereńdeı beredi. Osy múmkindikti paıdalana otyryp, Sizge zor densaýlyq pen jańa tabys, al baýyrlas Qazaqstan halqyna baq-bereke tileımin», – delingen.
Túrikmenstan Prezıdenti Gýrbangýly Berdimuhamedovtiń jedelhatynda da Qazaqstannyń egemendiktiń otyz jyly ishinde qol jetkizgen jetistikteri aıtylǵan.
«Táýelsizdik jyldary Qazaqstan óz memlekettiligin nyǵaıtý, halyqtyń turmysyn jaqsartý jáne halyqaralyq arenada abyroıyn arttyrý jolynda zor tabystarǵa jetti.
Biz jaqyn kórshimizdiń jetistikteri úshin qýanamyz jáne strategııalyq sıpatqa ıe ekijaqty qatynastardy damytýǵa daıynbyz», – dedi Gýrbangýly Berdimuhamedov.