Elbasy Astananyń jasyl beldeýi týraly: Býrabaıdaǵy ormandaı bolady

ASTANA. QazAqparat - Memleket basshysy Nursultan Nazarbaev Astana mańyndaǵy jasyl beldeýler aldaǵy ýaqytta qalaı ný ormanǵa aınalatynyn aıtyp berdi, dep habarlaıdy QazAqparat tilshisi.

Aıta ketsek, búgin Nursultan Nazarbaev Astananyń aınalasyna egilgen jasyl beldeýdi aralap, qyrǵaýyldardy erkindikke ushyrý sharasyna qatysty. Memleket basshysy orman sharýashylyǵynyń qyzmetkerlerinen Astana mańyna kóshet otyrǵyzý jumystary qalaı júrgizilip jatqanyn surady. Jumystyń ıgi baǵytta jalǵasyp jatqanyn kórgen Prezıdent bul sharýalarǵa kóńili tolatynyn bildirdi.

Aǵash otyrǵyzylyp, qyrǵaýyldar ushyrylǵannan keıin «Jasyl el» jastaryna arnap sóz sóılegen Elbasy 20 jyldyń ishinde Astana 1 mıllıon halqy bar shaharǵa aınalǵanyn atap ótti.

«Astana tanymal qala bolyp qana qoıǵan joq, álem elderi basshylary keletin, sporttyq sharalar ótetin shahar boldy. Ushaqpen kele jatqan kezde Astananyń tóńiregi qandaı ekenin kóretin shyǵarsyzdar. Biraq ta, mınıstrlerge syn aıtatyn da jaǵdaılar bar. Jınalǵanda aıtarmyn ol týraly. Birinshi otyrǵyzylǵan aǵashtar kóp jerlerde óspeı qaldy. Sodan keıin aǵashtardyń túrli aýrýlary bar. Oǵan túrli hımıkattar, tyńaıtqyshtar kerek», - dedi Nursultan Nazarbaev.

Prezıdent óz sózinde Astanany aınala qorshaǵa jasyl beldeý el úshin jasalyp jatqan kóp sharýalardyń biri bolyp sanalatynyn tilge tıek etti.

«Eldiń astanasy bolǵannan keıin osylaı bolý kerek. Máskeýdiń tóńireginde baıaǵydan ósetin orman bar. Kıevke barsań, tolǵan orman. Mınski de tolǵan orman. Keshe Qazanǵa bardym - tóńireginiń bári tabıǵı orman. Astananyń batys jaǵy budan da ádemi. Osynyń barlyǵy jastar úshin, sender úshin («Jasyl el» qataryndaǵy jastarǵa qarata aıtty - avt.), bolashaq úshin jasalyp jatyr. Myna orman keremet bolady. Bul aǵashtardyń saýdasy 30-40 jyldan keıin bitedi. Qazirgi aǵashtardyń ornyna qaraǵaılar shyǵady. Ómir solaı. Odan keıin Býrabaıdaǵy ormandaı bolyp jaıqalady», - dedi Prezıdent.

Aıta ketsek, Astana qalasyn jelden saqtaý úshin, halyqtyń qolaıly klımatta turýyn qalyptastyrý úshin Qazaqstan Respýblıkasynyń Prezıdenti N.Á.Nazarbaevpen 1997 jyldyń qyrkúıeginde jobany júzege asyrýdyń qıyndyǵyna qaramastan Astana qalasynyń jasyl beldeýin qurý týraly sheshim qabyldanǵan bolatyn.