Elbasy: Almatyǵa qar jaýmaǵanda, Astanadan aparar edik

ASTANA. QazAqparat - Almatyǵa qar jaýmaǵanda, Astanadan aparar edik. Búgin Almatyda ótken 28-inshi Dúnıejúzilik qysqy Ýnıversıada oıyndarynyń ashylý rásiminde sóz sóılegen Memleket basshysy Nursultan Nazarbaev osylaı qaljyńǵa basty, dep habarlaıdy QazAqparat tilshisi.

Elbasy sheteldik sarapshylardyń Almatynyń aýa raıyna qatysty qoıǵan suraǵyna da osylaı jaýap bergen eken.

"Jaqynda sheteldik sarapshylar maǵan "Almaty eldiń ońtústiginde ǵoı, qar jaýmaı qalsa, ne isteısizder?", degen suraq qoıdy. Men esh alańsyz "Astanadan əkelemiz", dep jaýap berdim. Qudaıǵa shúkir, qazir Almatyda qar qalyń, jarys kúnderi de qar mol bolady degen úmittemiz", - dedi Nursultan Nazarbaev.

Búgin Almatyda 28-inshi Dúnıejúzilik qysqy Ýnıversıada oıyndarynyń ashylý saltanaty ótti.  Sharaǵa qatysqan QR Prezıdenti jastar saıysyna 57 elden 2 myńnan astam sportshy, myńdaǵan sport mamany men jankúıer qatysyp jatqanyn atap ótti.  Ashylý rásiminde sportshylar sherýin 28-inshi Ýnıversıadanyń ıesi - Qazaqstan quramasy aıaqtady. Elimizdiń baıraǵyn shańǵyshy Dáýlet Rahymbaev alyp júrdi. El namysyn barlyǵy 175 sportshy qorǵaıdy.

Aıta keteıik, Almatydaǵy Ýnıversıada oıyndarynyń ashylý saltanatyna halyqaralyq stýdentter federatsııasynyń prezıdenti Oleg Matytsın jáne ózge de birqatar mártebeli meımandar qatysty.