Elbasy áleýmettik bastamalarymen halyqtyń qalaýyn dóp basty - Fahrıddın Qarataev
Depýtattyń atap ótýinshe, Prezıdenttiń birinshi bastamasy árbir otbasyna baspana alýdyń jańa múmkindikterin berýge arnalǵan. Bul rette Elbasy qazaqstandyqtardy qoljetimdi baspanamen qamtamasyz etýdiń jańa baǵdarlamasyn jarııa etip, ıpotekalyq nesıeniń jyldyq mólsheri 7 paıyzdan aspaıtyn, bastapqy jarna 20 paıyzǵa deıin, merzimi 25 jylǵa deıin bolatyndyǵyn dep atap kórsetti.
«Ekinshi bastama jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtýǵa baǵyttalǵan. Onda Prezıdent jalaqysy tómen qazaqstandyqtardy qoldaý úshin 2019 jyldyń 1 qańtarynan bastap olardyń salyq júktemesin 10 esege azaıtyp, 1 protsent qana salyq salýdy usyndy», - dedi ol.
Onyń aıtýynsha, Prezıdenttiń úshinshi bastamasy joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartýǵa arnalǵan.
«Onda Elbasy joǵary bilim alýdyń qoljetimdiligi men sapasyn arttyrý úshin tómendegideı sharalardy usyndy. Jyl saıyn bólinetin 54 myń grantqa qosymsha 2018-2019 oqý jylynda taǵy 20 myń grant bólinedi. Onyń 11 myńy tehnıkalyq mamandyqtar boıynsha bakalavrlyq bilim berýge tıesili bolady. Bul tórtinshi ónerkásiptik revolıýtsııa jaǵdaıyndaǵy jańa ekonomıkada zor suranysqa ıe bolatyn san myń jańa mamandy daıarlaýǵa múmkindik beredi. Munda eń aldymen ınjenerler, aqparattyq tehnologııa, robot tehnıkasy, nanotehnologııa salasynyń mamandary týraly sóz bolyp otyr», - dedi Fahrıddın Qarataev.
Májilismen tórtinshi bastama shaǵyn nesıe berýdi kóbeıtý jaıynda bolǵanyn basa aıtty.
«Ózin-ózi eńbekpen qamtyǵan jáne jumyssyz turǵyndardyń arasynda jappaı kásipkerlikti damytý úshin atqarylyp jatqan jumystardyń aıasynda jeńildetilgen shaǵyn nesıe berý maqsatynda 2017 jyly jalpy somasy 32 mıllıard teńge bolatyn 7200 shaǵyn nesıe berilgenine nazar aýdarǵan Elbasy qosymsha 20 mıllıard teńge bólip, shaǵyn nesıelerdiń jalpy somasyn 62 mıllıard teńgege jetkizýdi tapsyrdy. Nátıjesinde shaǵyn nesıe alatyndardyń sany 2017 jylmen salystyrǵanda 2 esege artyp, 14 myń adamǵa jetetin bolady. Bastama myńdaǵan adamǵa óz isin ashýǵa múmkindik beretindigimen mańyzdy etti. Bul, ásirese, aýyl-aımaqtar úshin, aýyldaǵy kásipkerlikti damytý úshin aıryqsha mańyzdy», - dedi depýtat.
Elbasynyń besinshi bastamasy eldi gazben qamtamasyz etýdi jalǵastyrý bolǵandyǵyn aıtty.
«Ásirese, Astanany gazdandyrý máselesin kóterip, Qyzylorda oblysynan Jezqazǵan-Qaraǵandy-Temirtaý-Astana baǵytynda magıstraldi gaz qubyryn salý jobasyn 1, 1,5 jylda júzege asyrýdy tapsyrdy. Elimizde gaz óndirý Táýelsizdik kezeńinde jylyna 8-den 52 mıllıard tekshe metrge deıin artty, ári qaraı da óse túsedi. Gazǵa kóshý tek Astananyń ózinde zııandy qaldyqtardyń aýaǵa taralýyn 6 esege nemese jylyna 35 myń tonnaǵa azaıtady. Bul jobany júzege asyrý ári qaraı ózge óńirlerdi de gazben qamtamasyz etýge múmkindik beretindigin atap kórsetti. Jalpy bul bastamalar halyqtyń kókeıindegi máselelerdi dóp basyp otyr. Sondyqtan Prezıdenttiń bes bastamasyna qoldaý bildirip, elimizdiń jarqyn bolashaǵy úshin birlese jumys isteýge shaqyramyn», - dedi Fahrıddın Qarataev.