Elbasy aldaǵy jeti jylda eńbek ónimdiligin 1,7 ese arttyrýdy tapsyrdy

ASTANA. QazAqparat - Búgin Astanada ótken «Indýstrııalandyrýdyń ekinshi besjyldyǵy: Qazaqstanda jasalǵan» atty jalpyulttyq telekópir barysynda Elbasy Nursultan Nazarbaev 2025 jylǵa qaraı eńbek ónimdiligin 1,7 ese arttyrýdy tapsyrdy, dep habarlaıdy QazAqparat tilshisi.

«Esep-qısaptardan biraz dúnıege qol jetkizgenimiz kórinip tur. Degenmen, álemge óktemdik etip turǵan jańa syn-tegeýirinder bizden naqty nátıjeler men úshinshi ındýstrııalandyrý baǵdarlamasynyń strategııasyn oılastyrýdy talap etedi. Ol óńdeý ónerkásibi men eksporttyń damýyna shoǵyrlandyrylyp, sabaqtastyǵyn saqtaýy tıis. 2025 jylǵa qaraı eńbek ónimdiligi 1,7 ese, ónim eksporty 2,3 ese ósýi qajet. Árbir jyldy  osy kórsetkishtermen qorytyndylap, toqsan saıyn qandaı oblys, qandaı sala eńbek ónimdiligin kótergenin qadaǵalap otyrý kerek. Bul mańyzdy. Olaı bolmaǵan jaǵdaıda artta qalamyz, adamdardyń tabysy, ekonomıka óspeıdi», - dedi Elbasy.

Osy rette Memleket basshysy elimizdiń barlyq munaı óńdeý zaýyttary jańǵyrtylǵanyn atap ótti.

«Endi Qazaqstan ózin munaı ónimderimen qamtamasyz etedi. Onyń ishinde únemi syrttan alyp kelgen avıatsııalyq  otyn da bar. Biz ony aıaqtadyq, qor jetkilikti.  Elektr energııasynda profıtsıt bar», - dedi QR Prezıdenti.