Elbasy: Ákimder esebi formaldylyqqa aınalyp ketken
"Bizde óńirlik damýda aıtarlyqtaı aıyrmashylyq bar. Nege bir oblystyń joly jaqsy, al ekinshisinde nashar? Bir jerde turǵyn úı-kommýnaldyq sharýashylyq turaqty bolsa, endi bir jerlerde irkilis oryn alýda? Demek, shynymen jumys isteıtin, adamdardyń problemasyn biletin jáne sheshetin ákimder bar degen sóz. Degenmen, halyqpen tildesýden qashatyn jáne óńir turǵyndarynyń shynaıy qajettilikterin qaperge almaıtyndar da bar", - dedi Elbasy.
Osy rette Memleket basshysy óńir ákimderi halyqqa jaqyn bolýy jáne olardyń ıgiligi úshin barlyǵyn jasaýy qajettigin basa aıtty.
"Árıne, olar jumys istep jatyr. Jumys istemeıdi dep aıta almaımyn. Biraq, halyqqa jaqyn bolýy kerek. Qazir bizde ákim jylyna bir ret esep beretin tártip bar. Alaıda, ol formaldylyqqa aınalyp ketti. Ákimder jylyna bir ret emes, jyl boıy halyqtyń túrli sanattary: dárigerlermen, muǵalimdermen, jastarmen kezdesýi tıis. Bizde túrli baǵdarlamalar bar, jetkilikti resýrs ta bólingen. Biraq, naqty nátıjeler kórinbeıdi. Eshkim túsindirmeıdi. Mundaıǵa jol berilmeýi tıis", - dedi N.Nazarbaev.