Elbasy agroónerkásiptik keshendi damytý isin №1 basymdyq retinde anyqtap berdi - Aýyl sharýashylyǵy mınıstrligi komıteti tóraǵasynyń orynbasary
Memleket basshysy Nursultan Nazarbaevtyń tikeleı jelidegi dıalogyna qatysty óz oıyn bildirgen Aýyl sharýashylyǵy mınıstrliginiń Aýyldyq aýmaqtar isteri jónindegi komıteti tóraǵasynyń orynbasary Mıhaıl Troshıhın osylaı dedi.
«Aýyl sharýashylyǵyn damytý úshin aldaǵy jyldary júzdegen mıllıard teńge bólinedi. Biz osy jolda aıtýly jetistikterge qol jetkize alatynymyzǵa senimdimin», dep málim etti M.Troshıhın.
Onyń aıtýynsha, aýyl sharýashylyǵynda qazirdiń ózinde jaqsy jetistikter bar. «Aǵymdaǵy jyly biz, ylǵal únemdeý tehnologııalaryn, surypty tuqymdardy, tyńaıtqyshtardy, bir sózben aıtqanda, jańa tehnologııalardy qoldanýdyń arqasynda 23 mıllıon tonna astyq jınadyq», dep atap kórsetti ol.
M.Troshıhın óz sózinde atap kórsetkendeı, qazir agroónerkásiptik keshendi tehnologııalyq qaıta jaraqtaý úderisi júrip jatyr: bordaqylaý alańdary, sút keshenderi salynýda, aýyl sharýashylyǵynyń ekonomıkasyn nyǵaıtýǵa, jańa jumys oryndaryn qurýǵa jáne bizdiń eksporttyq baǵytta ilgerileýimizge baǵyttalǵan óte kóp ınvestıtsııalyq jobalar júzege asyrylýda. «Bizde álemge sata alatyn ónimder jeterlik: búginde biz un eksporty boıynsha álemde birinshi oryndamyz, astyq eksporttaýshy elderdiń alǵashqy bestigine kiremiz», deıdi ol.
Prezıdentpen tikeleı efırde bolǵan dıalogtan alǵan áserine toqtalǵan M.Troshıhın, Elbasynyń bizdiń azamattarymyzdy kóbirek tolǵandyryp otyrǵan barlyq derlik saýaldarǵa jaýap bergenin aıtty.