Elbasy «7-20-25» týraly: Memleket munan artyq jeńildik jasaı almaıdy

ASTANA. QazAqparat - «7-20-25» baǵdarlamasynyń júzege asyrylýyn úkimettik emes uıymdar baqylaýǵa alýy tıis. Bul týraly búgin elordadaǵy Táýelsizdik saraıynda ótip jatqan VIII Azamattyq forýmda Elbasy Nursultan Nazarbaev aıtty, dep habarlaıdy QazAqparat tilshisi.

«Turǵyn úı qurylysy boıynsha baǵdarlama bar. Ne isteý kerek? Alatyn páterdiń jalpy qunynyń 50, 70 paıyzyn emes ne bári 20 paıyz qunyn jınaýyńyz qajet. 25 jylǵa 7 paıyzben nesıe alasyz. Men eseptep shyqtym. Eger otbasyda 2 adam jumys isteıtin bolsa, tabystarynyń 20-30 paıyzyn tólep tura alady. Tólep bitkennen keıin páter seniki bolady», - dedi Elbasy.

QR Prezıdentiniń paıymynsha, álemniń esh jerinde mundaı baǵdarlama joq.

«Biz muny jasadyq, ony jumys istep, paıdalaný qajet. Nıet tanytýshylar az deıdi. Biz barlyǵyn ıtermeleımiz. Qalaǵandary alsyn. Memleket munan artyq jeńildik bere almaıdy», - dedi Nursultan Nazarbaev.

Osy rette Memleket basshysy «7-20-25» baǵdarlamasynyń júzege asyrylýyn úkimettik emes uıymdar baqylaýǵa alýy tıistigin atap ótti.