«El jáne Elbasy» kitabynyń tusaýkeseri ótti

NUR-SULTAN. QazAqparat - Búgin QR Tuńǵysh Prezıdenti-Elbasy kitaphanasynyń mýzeıinde «Qazaqstan joly» jobasy aıasynda «Egemen Qazaqstan» respýblıkalyq gazeti» AQ daıyndaǵan «El jáne Elbasy» kitabynyń tusaýkeseri ótti. Sonymen qatar Táýelsizdiktiń 30 jyldyǵyna oraılastyrylǵan «Egemendik jáne Elbasy» fotokórmesi ashyldy, dep habarlaıdy QazAqparat tilshisi.

Fotokórmege Shúkir Shahaı, Igor Býrgandınov, ıÝrıı Bekker, Orynbaı Balmurat jáne Erlan Omarov sııaqty belgili fototilshilerdiń 50-ge jýyq fotosýreti qoıyldy.

Olar tıimdi ekonomıka men saıası júıeni damytýdyń ózindik úlgisi bar zamanaýı Qazaqstannyń qalyptasýyndaǵy etnosaralyq qatynastardy úılestirý jolynda azamattyq biregeılikti, etnosaralyq túsinistikti nyǵaıtýdaǵy Elbasy qyzmetiniń mańyzdy kezeńderin aıqyndaıdy.

Fotokórmege kelýshiler Qazaqstannyń damýyndaǵy jańa belesterge jol ashqan táýelsizdik tarıhynyń asa mańyzdy qadamdarymen tanysýǵa múmkindik alady.

Іs-shara aıasynda «Egemen Qazaqstan kitaphanasy» serııasymen jaryq kórgen «El jáne Elbasy» jınaǵynyń tusaýy kesildi.

Basylymda Elbasynyń áriptes memleket jáne qoǵam qaıratkerleriniń, úzeńgilesteriniń «Egemen Qazaqstan» gazetinde jarııalaǵan maqalalary men estelikteri usynylǵan.

Kitap 4 bólimdi qamtıdy. «Azattyq sáýletshisi» bóliminde Memleket basshysy Q.K. Toqaevtyń «Tarıhı tulǵa taǵylymy» maqalasy men qazaqstandyq saıası jáne qoǵam qaıratkerleriniń maqalalary berilgen.

«Memleket sáýletshisi» bóliminde zııaly qaýymnyń, aqyn-jazýshylar men ǵalymdardyń, t.b. óner jáne mádenıet qaıratkerleriniń estelikteri berilgen.

«Elbasy jáne elorda» bólimi Elbasynyń astana qurylysyna qosqan úlesi týraly memleket jáne qoǵam qaıratkerleriniń maqalalaryn qamtıdy.

«Kóregen saıasatker» bóliminde Elbasynyń jahandyq saıasattaǵy orny men róli týraly álemdik saıasatkerlerdiń oı-pikirleri usynylǵan.