Elvıra Ázimova Bas Prokýratýradan tártipsizdikterge qatysqandardy bas bostandyǵynan aıyrý jazasyn basqa sharamen almastyrýdy surady

NUR-SULTAN. QazAqparat – Adam quqyqtary jónindegi ýákil Elvıra Ázimova Bas Prokýratýradan qańtar tragedııasy kezinde alǵash ret qylmys jasaǵandardy bas bostandyǵynan aıyrý jazasyn basqa sharamen almastyrýdy surady, dep habarlaıdy QazAqparat tilshisi.

«Memleket basshysy eldegi jappaı mıtıngilerdiń sebebi áleýmettik, ekonomıkalyq jáne saıası problemalardiń sheshilmeýi bolǵanyn atap ótti. Azamattardyń kóbinde jappaı mıtıngilerge qatysý óz pikirin ashyq bildirýge negizdelgen májbúrli qadam bolǵan. Biraq mundaı qadam zorlyq-zombylyq jáne qıratýǵa qatysqandar men qarý qoldanǵandardy aqtamaıdy», - dedi Adam quqyqtary jónindegi ýákil.

Sondaı-aq, ol Memleket basshysynyń jyl basynda beıbit mıtıngiler mádenıetin qamtamasyz etýdiń mańyzdylyǵyn aıtqanyn eske saldy.

«Sondyqtan jappaı tártipsizdikterge qatysýyna baılanysty qylmystyq qýdalaý orbıtasyna alǵash ret engen azamattarǵa aýyrlyq dárejesin ǵana emes, olardyń jeke basyn, shyn júrekten ókinetinin eskerýdi suraımyn.

Kiná dáleldengen jaǵdaıda bas bostandyǵynan aıyrý jazasynyń ornyna balama qylmystyq jazalaý sharalaryn qarastyrýdy suraımyn. Árıne, bul turǵyda da tıimdi tergeý júrgizýge kómek tıgizýimiz kerek», - dedi Elvıra Ázimova.