Elvıra Ázimova: Azamattyq qoǵam ózine jaýapkershilik alýǵa daıyn

NUR-SULTAN. QazAqparat - Zamanyna qaraı jastar da qazir transformatsııadan ótýde. Qazirgi býynnyń mindeti - sol transformatsııany oń baǵytqa burý. «Prezıdenttik jańa saıası reformalar» paketi atty dóńgelek ústelde QR-daǵy Adam quqyqtary jónindegi ýákil Elvıra Ázimova osylaı dedi, dep habarlaıdy Qazaqparat tilshisi.

«Prezıdent kótergen máseleler (Parlamenttiń birinshi sessııasynda) halyqaralyq dárejede de burynnan beri kóterilip kele jatqany belgili. Memleket nemese memlekettik organdar buǵan qarsy bolyp keldi dep aıtýǵa kelmes. Ártúrli reforma qabyldanyp keldi. Osy jıynda aıtylǵandaı, qabyldanǵan bir sheshimniń sońynda tolyqqandy máseleler kesheni júretini zańdy. Taıaýda jarııalanǵan saıası reformalardyń úshinshi paketi týraly aıtar bolsaq, meniń oıymsha azamattyq qoǵam da ózine jaýapkershilik alýy kerek. Azamattyq qoǵam ol jaýapkershilikti alýǵa daıyn», - dedi Elvıra Ázimova dóńgelek ústelde.

Onyń aıtýynsha adam quqyǵy árdaıym birinshi orynda turýy kerek. Qazaqstannyń Konstıtýtsııasynda da solaı jazylǵan.

«Áleýmettik jeli damyp, árkim oıyna keletinin jaza alatyn zamanda, al ol aqparattyń shyn-ótirigi tekserile bermeıtin ýaqytta qoǵamda ártúrli pikir qalyptasady. Óz kezeginde bul jaǵdaı qoǵamdy jik-jikke bólinýi múmkin. Sebebi bárimiz zańǵa súıengenimizben, moraldyq qundylyqtar da bar. Álbette ár halyqtyń óziniń izgi salt-dástúrleri bar. Ony saqtap, keıinge qaldyrý kerek. Sonymen qatar qazirgi jastar - osydan on jyl burynǵy jastarǵa uqsamaıtynyn da eskergen abzal. Olar álemdi basqasha qabyldaıdy. Qalaısyz ba, joq pa olar da belgili bir transformatsııadan ótip jatyr. Bizdiń mindet - osy transformatsııa ońynan bolýy kerek», - dedi ol.