El Úkimeti qabyldaǵan Innovatsııany damytý baǵdarlamasy 2 kezeńmen júzege asyrylmaq

ANA. 6 jeltoqsan. QazAqparat /Marlan Jıembaı/ - Innovatsııany damytý jáne ǵylymı-tehnıkalyq damý salaaralyq josparyn tehnıkalyq jańartýǵa járdemdesý baǵdarlamasy eki kezeńmen júzege asyrylady.

Bul týraly búgin Úkimet otyrysynda QR Indýstrııa jáne jańa tehnologııalar vıtse-mınıstri Nurmuhambet Ábdibekov málim etti.

Onyń atap ótýinshe, ekonomıkalyq básekege qabilettiligin arttyrýdy qamtamasyz etetin ulttyq ınnovatsııalyq júıeni qurý baǵdarlamanyń negizi maqsaty bolyp tabylady. Bul oraıda vıtse-mınıstr: «Onyń negizgi maqsattary - tehnologııalyq jańarýǵa járdemdesý, ózindik kompetentsııa qurý, ınnovatsııalyq ortany damytý», - dep basa aıtty.

N.Ábdibekovtiń aıtýyna qaraǵanda, qolǵa alynyp otyrǵan baǵdarlama eki kezeń boıynsha júzege aspaq. Alǵashqy kezeńde tehnologııalyq damýdy basqarý júıesi qurylady, normatıvtik-quqyqtyq bazasy jetildiriledi, ınnovatsııalyq qoldaý baǵdarlamalarynyń jańa túrleri ázirlenedi, sondaı-aq onyń úrdisterin saraptamalyq qoldaý júıesi iske qosylatyn bolady.

«Ekinshi kezeń jańa baǵdarlamalardy júıeli qoldaný jáne birinshi kezeńde ázirlengen ınnovatsııalyq damýdy qoldaý tetikterimen sıpattalady»,- dedi QR Indýstrııa jáne jańa tehnologııalar vıtse-mınıstri.