El tarıhyndaǵy eń iri paradqa 5 myń áskerı qyzmetshi qatysty

  ASTANA. QazAqparat - Adamzat tarıhyndaǵy eń surapyl soǵystyń Uly Jeńisine 72 jyl jáne táýelsiz Qazaqstannyń tól armııasyna 25 jyl tolýyna oraı 2017 jyldyń 7 mamyrynda Astanadaǵy «Qazaq Eli» alańynda el tarıhyndaǵy eń iri áskerı parad ótti. Onda 5 myńnan astam áskerı qyzmetshi, 300 áskerı tehnıka men 70 áskerı avıatsııa ushaǵy Qazaqstan Qarýly Kúshteri qol jetkizgen eren jetistikterdi kórsetti, dep habarlaıdy «QazAqparat» HAA tilshisi.

Saltanatty sherýdi Qazaqstan Respýblıkasy Áýe qorǵanysy kúshteriniń tikushaqtar toby ashty. Olar belgilengen tártipte jyljı otyryp, áýede 25 merekelik datasynyń beınesin jasady. Jaıaý ásker legin «Jas ulan» áskerı mektepteriniń tárbıelenýshileri - barabanshylar rotasy bastady. Barabanshylar sapynda Astana, Almaty, Qaraǵandy jáne Shymkent qalalaryndaǵy Respýblıkalyq «Jas ulan» mektepteriniń úzdik oqýshylary bar.



Barabanshylardan keıin sherýdi QR Qorǵanys mınıstrliginiń ofıtserler toby jalǵastyrdy. Ári qaraı Qurlyq áskeri, Áýe qorǵanysy kúshteri, Áskerı-teńiz kúshteri, «Ońtústik», «Shyǵys», «Astana, «Batys» óńirlik qolbasshylyqtary, Desanttyq-shabýyldaýshy áskerler, barlaýshylar rotasy, Arnaıy operatsııalar kúshteri, Áskerı polıtsııa, «Qazbat» bitimgershilik rotasy jáne QR UQK Shekara qyzmeti «Boran» arnaıy rotasynyń paradtyq eseptoptary júrip ótti.

  

Sonymen birge, paradqa Radıoelektronıka jáne baılanys Áskerı-ınjenerlik ınstıtýtynyń, Talǵat Bıgeldınov atyndaǵy Áýe qorǵanysy kúshteriniń áskerı ınstıtýtynyń, Shoqan Ýálıhanov atyndaǵy Kadet korpýsynyń, Ulttyq qaýipsizdik komıteti Shekara qyzmeti akademııasynyń kýrsanttary, QR Tuńǵysh Prezıdenti atyndaǵy Ulttyq qorǵanys ýnıversıtetiniń ofıtserleri, QR Ulttyq ulan Áskerı ınstıtýtynyń túlekteri, Ulttyq gvardııa áskerıleri qatysty. Jaıaý ásker legin Qazaqstan Respýblıkasy memlekettik kúzet qyzmetiniń rotasy túıindedi.

 

Mehanıkalandyrylǵan lek basynda qazaqstandyqtar 2016-2017 jyldary satyp alynǵan zamanaýı áskerı tehnıka men jańa qarý-jaraq túrlerin tamashalady. Áýe qorǵanysy kúshteriniń eń úzdik ushý apparattary Astana aspanynda óz sheberlikterin kórsetti. «Romb» jaýyngerlik tártibinde sap túzegen «Jetisý» pılottyq toby SÝ-27 aýyr joıǵysh ushaqtarymen Astana aspanynda «Báıterek» atty joǵary pılotaj fıgýrasyn jasady. 

 

 

Eske sala ketsek, osydan 25 jyl buryn 1992 jyldyń 7 mamyrynda El Prezıdenti Nursultan Nazarbaev Qazaqstan Respýblıkasynyń Qarýly Kúshterin qurý týraly Jarlyqqa qol qoıdy. Shırek ǵasyrda Qazaqstan Qarýly Kúshteriniń jańa beınesi qalyptasty. Sany az bolsa da, kásibı biliktiligi joǵary, jınaqy, zamanaýı qarý-jaraqtarmen, jańa áskerı tehnıkalarmen jaraqtandyrylǵan Armııa quryldy.