El sportshylary latyn álipbıine kóshýdi qoldaıdy
Buǵan Elbasynyń atyna kelip-túsip jatqan hattar dálel bola alady. Qoldaý bildirgenderdiń qatarynda bokstan QR eńbek sińirgen jattyqtyrýshysy Amalbek Tshanov, jazǵy XXXI Olımpıada oıyndarynyń chempıony Dmıtrıı Balandın men kúmis júldegeri Jazıra Japparqul bar.
XXXI jazǵy Olımpıada oıyndarynyń kúmis júldegeri Jazıra Japparqul barlyq qazaqstandyq sportshylardyń atynan Elbasyna el sportyn damytýǵa qosqan qomaqty úlesi úshin zor alǵysyn bildirdi. «Aǵymdaǵy jyldyń sáýir aıynda shyqqan «Bolashaqqa baǵdar: rýhanı jańǵyrý» atty Sizdiń maqalańyzdy muqııat oqyp, odan alǵan sheksiz qýanyshymdy sózben jetkize almaspyn. Osy maqalada qazaq tilin latyn álipbıine kóshirý týraly bastama birden kóńilimnen shyqty. Mundaı qadam qoǵamdyq sanany jańǵyrtýdyń negizgi qaǵıdalaryn qalyptastyrýǵa ǵana emes, sonymen qatar búgingi zamanǵa saı damýymyzǵa ıgi yqpal etetini kúmánsiz. Osy baǵyttaǵy Sizdiń salıqaly saıasatyńyzdyń nátıjesinde Qazaqstan azamattaryn tek jarqyn bolashaq kútip turǵanyn senimmen aıta alamyn»,- delingen Olımpıada jeńimpazynyń hatynda.
Qazaq tili álipbıiniń kırıll qarpinen latyn qarpine aýysýyn qoldaǵan ujymdardyń qatarynda: «Qazirgi bessaıystan jáne sý sporty túrlerinen olımpıadalyq daıarlaý ortalyǵy» RMQK, «Dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵy» RMQK, «Dene múmkindikteri shekteýli tulǵalarǵa arnalǵan sporttyq daıarlaý ortalyǵy» RMQK, Boks boıynsha olımpıadalyq daıarlaý ortalyǵy, Kúres túrleri boıynsha olımpıadalyq daıyndyq ortalyǵy, Ulttyq jáne at sporty túrleri boıynsha ortalyq, Astana qalasynyń olımpıadalyq ortalyǵy, Óskemen qalasynyń olımpıadalyq ortalyǵy, Shtattyq ulttyq komandalar jáne sporttyq rezerv dırektsııasy jáne t.b. bar.
«Qazaq tilin jańǵyrtý qajettiligi onyń barlyq áleýetin tek kommýnıkatsııa quraly retinde ǵana ashyp qoımaı, ulttyq sáıkestikti nyǵaıtý, ulttyq jandanýdyń qýatty faktory retinde tanytýda. Álipbıdiń reformasy tarıhı alǵysharttarǵa negizdelgen. Ol Qazaqstannyń jahandyq básekelestigin joǵarylatýǵa, álemniń ǵylymı-tanymdyq, tehnologııalyq jáne kommýnıkatsııalyq keńistigine qarqyndy birigýge baǵyttalǵan»,- degen ustanymyn bildiripti hat joldaýshylar.
Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń dırektory A. Tıýmteev óz hatynda: «Latyn álipbıine kóshýdi biraýyzdan qoldaımyz. Birinshiden, bul jastarymyzdyń bolashaqta damýyna úlken septigin tıgizedi. Bul bizdiń qoǵamnyń álemdegi eń damyǵan ǵylymǵa, ádebıetke jaqyndaýyna zor yqpalyn tıgizedi. Latyn qarpine kóshý sondaı-aq túrki halyqtarymen qarym-qatynasty nyǵaıtýǵa úlken septigin tıgizedi»,-dep jazady.
Aýyr atletıkadan halyqaralyq dárejedegi sport sheberi Aıdar Qazov Soltústik Qazaqstan oblysyndaǵy sport súıer jastardyń atynan Elbasyna zor alǵysyn jetkizipti. «Búgingi tańda biz jahandyq jańarýlardyń tabaldyryǵynda turmyz. Bul shynynda da táýelsiz Qazaqstan úshin tarıhı sátterdiń biri. Qazaq tiliniń latyn álippesine kóshirilýi elimizdiń keleshegi úshin zor múmkindikterge jol ashady jáne óz tamyrymyzǵa oralýǵa jaǵdaı týǵyzady»,-delingen A. Qazovtyń quttyqtaý hatynda.