«El pikiri eskerýsiz qalmaıdy» - baspasózge sholý
Elbasynyń «100 naqty qadam» Ult Josparynda belgilengen 93-qadamdaǵy «Memlekettik aýdıt jáne qarjylyq baqylaý týraly» zań qabyldaý tapsyrmasy boıynsha, 3 jyl kóleminde osy baǵytta zańdy daıyndaý jumystary júrgizildi. «Egemen Qazaqstan» gazetiniń jazýynsha, bul jóninde Prezıdent janyndaǵy Ortalyq kommýnıkatsııalar qyzmetinde ótken baspasóz máslıhatynda Qarjy vıtse-mınıstri Rýslan Beketaev málim etti. Onyń aıtýyna qaraǵanda, qarjylyq esep aýdıti memlekettik standarttary boıynsha prıntsıp mánin esepke alyp jáne tańdaýdy qoldaný arqyly júzege asyrylady. Bul oraıda, jergilikti bıýdjetten bastap, 2019 jyly Esep komıteti aýdıtine respýblıkalyq bıýdjettiń shoǵyrlandyrylǵan qarjylyq eseptiligine daıyndalý mindeti tur. Qarjylyq esep aýdıti esepke alynbaǵan aktıvter jáne mindettemelerdi kórsetý úshin iske asyrylady. «Sonymen qatar, ishki memlekettik aýdıt komıteti buzýshylyq faktilerdi anyqtaý jáne eskertý jasaý ádis-tásilderine ózgerister engizýde. Halyqaralyq talaptarǵa saı, biz kózdelgen nysandardan mindetti túrde buzýshylyq taýyp, aıyptalýshylarǵa shara qoldanýǵa kelgen qarsylas retinde emes, kerisinshe, jaǵdaıdy tártipke salý úshin jáne bolashaqta quqyqqa qaıshy isterdiń qaıtalanýyna jol bermeý baǵytynda jumys jasaýymyz qajet», - dedi vıtse-mınıstr. Maqala «Qarjylyq baqylaý qatań bolmaqshy» degen taqyryppen berilgen.
«Jer reformasy boıynsha respýblıkalyq komıssııanyń alǵashqy kóshpeli májilisi Kókshetaýda ótkizildi. Onyń jumysyna Premer-Mınıstrdiń birinshi orynbasary Baqytjan Saǵyntaev tóraǵalyq etti. «Jer kodeksine engizilgen jańa ózgeristerdi talqylaý» kún tártibin qarastyrǵan otyrysqa Respýblıkalyq komıssııanyń 29 múshesi, oblystyq vedomstvolardyń, sharýashylyq qurylymdarynyń basshylary, máslıhat depýtattary, azamattyq qoǵam jáne BAQ ókilderi qatysty», - dep jazady «Egemen Qazaqstan» gazeti senbilik sanyndaǵy «El pikiri eskerýsiz qalmaıdy» degen taqyryptaǵy maqalada. Jer reformasy boıynsha respýblıkalyq komıssııanyń tóraǵasy Baqytjan Saǵyntaev Memleket basshysynyń tapsyrmasymen qurylǵan onyń Astanada ótkizilgen alǵashqy úsh májilisi el aýqymyndaǵy ózekti máseleni talqylaýda sarabdaldyq pen salıqalyq úlgisin tanytqanyn atap ótti. «Onda pikir alýandyǵy men ashyqtyǵynyń qamtamasyz etilýi ornyqty sheshimder qabyldanýyna negiz bola alady. Bul oraıda el men jerdi bólip qaraýǵa bolmaıdy. Sondyqtan, komıssııa músheleriniń aqyldasý aıasyn aımaqtarǵa shyǵarý týraly usynysy qyzý qoldaý tapty. Alǵashqy májilistiń astanalyq Aqmola oblysynda shaqyrylýy da kezdeısoq emes. Bul óńir elordamyzdyń aglomeratsııalyq aımaǵyn qalyptastyrýshy ári elimizdegi agroónerkásip óndirisi damyǵan aımaqtardyń biri. Sondaı-aq, Kókshetaýdaǵy májilisimiz Memlekettik rámizder kúnimen tuspa-tus kelýin jaqsy nyshanǵa balaımyz. Barshańyzdy merekemen quttyqtaımyn», - dedi birinshi Vıtse-premer. Basylymnyń jazýynsha, májiliske qatysýshy Respýblıkalyq komıssııa músheleri Kenjeǵalı Saǵadıevtiń, Ibragım Janǵorazovtyń ataly sózin, Qýanysh Aıtahanovtyń, Aqylbek Kúrishbaevtyń, Ivan Saýerdiń, Jeksenbaı Dúısebaevtyń, Murat Ábenovtiń salıqaly pikirin, Ákim Januzaqovtyń, Dosmuhambet Kóshimniń, Aıdos Sarymnyń baıypty baılamdaryn yqylas qoıa tyńdady.
***
«Keshe Qarqaralydan 200 shaqyrym jerdegi Daǵandeli ózeni boıyndaǵy qyratta Shanyshqaly Berdiqoja batyrdyń mavzoleıi saltanatty jaǵdaıda ashyldy», - dep jazady «Kazahstanskaıa pravda». Qazaqtyń uly oıshyly, tarıhshy, etnograf Máshhúr Júsip Kópeevtiń málimetterine sáıkes, Abylaı hannyń eń senimdi batyrlarynyń biri, Jońǵarǵa qarsy Uly júzdiń qolyn bastaǵan batyrdyń múrdesi ol qaıtys bolǵannan soń 230 jyldan keıin 2012 jyldyń maýysym aıynda qaıta jer qoınyna berilgen edi. Buǵan qosa Reseı Ǵylym akademııasynyń ǵalymdary Tatıana Balýeva men Elızaveta Veselovskaıa Á.Marǵulan atyndaǵy Arheologııa ınstıtýtymen birlesip, batyrdyń bet-beınesin qaıta somdap shyqqan edi. Tolyǵyraq «Batyr, zaşıtnık, dıplomat» degen materıalda.
***
«Horosho sıadem». «Vremıa» gazetinde dál osy taqyryppen berilgen maqalada Qazaqstannyń 6 oblysynda taıaý ýaqytta jaıly kameralary bar jekemenshik túrmelerdiń ashylatyndyǵy aıtylǵan. Basylymnyń jazýynsha, túzeý mekemesiniń qurylysy úshin Astana, Petropavl, Qyzylorda, Oral jáne Qaraǵandy qalalarynda jer telimi de bólingen. Bul qalalalarda kelesi jyly jobalyq-smetalyq qujattaryn daıyndaý isi qolǵa alynbaq. Eski abaqtylar súrilip tastalmaq. Shymkentte 1500 orynǵa arnalǵan zamanaýı túrmeniń mundaı qujaty daıyndalý ústinde. Investorlardyń qarjysy salynatyn túzeý mekemesiniń kamerasy álemdik standartqa saı bolady.