El óńirlerinde qysqy dońǵalaq aýystyrý quny neshe teńgege baǵalanýda

<p>ASTANA. KAZINFORM - Elimizdiń soltústik óńirlerinde kólik júrgizýshileri qys mezgiline saı dońǵalaǵyn aýystyrýdy bastap ketti. Osy oraıda Kazinform tilshisi shınamontaj sheberleriniń qyzmeti neshe teńge turatynyn anyqtap bildi.</p>

Mamandar qazirden-aq kóliktiń dóńgelegin aýystyryp, qysqa daıyn bolǵan jón dep otyr. Bul tek aqshany emes, ýaqytty únemdeýge múmkindik beredi.

Jazǵy jáne qysqy dóńgelektiń aıyrmashylyǵy — onyń hımııalyq quramy ystyq jáne sýyq aýa temperatýrasyna laıyqtalyp jasalǵanynda. Jazǵy dóńgelek qatty, nyǵyz bolady. Shilińgir ystyqta asfaltta formasyn joǵaltpaıdy. Tejegishti shuǵyl basqan sátte sol qasıetiniń arqasynda balqyp ketpeıdi. 

Al, qysqy dońǵalaqtar úskirik aıazdarda qatyp qalmaı, óziniń jumsaq kúıin ustap tura alady. Bul óz kezeginde tejegishti basqanda, dońǵalaqtyń taıyp, jol ústimen syrǵı bermeı, jyldamdyqty tez báseńdetýge múmkindik beredi. 

Aıtyp óteıik, QR zańnamasynda 1 jeltoqsan men 1 naýryz aralyǵynda kólik ıeleri qysqy mezgilge arnalǵan dóńgelekti paıdalanýy kerek dep kórsetilgen. Eger talapty eskermese, Ákimshilik quqyqbuzýshylyq týraly kodekstiń 590 baby 5 bóliginde kórsetilgen 5 AEK (18460 tg) kóleminde aıyppul tóleıdi.

Óńirlerde dóńgelek aýystyrý qyzmetiniń quny belgili boldy.

Infografıka: Kazinform