Elmıra Sýhanberdıeva Astana qalasy Bilim basqarmasynyń basshysy bolyp taǵaıyndaldy

ASTANA. 20 qańtar. QazAqparat - Astanada Bilim basqarmasynyń jańa basshysy taǵaıyndaldy. Bul qyzmetti Elmıra Sýhanberdıeva atqaratyn boldy. Bul týraly astana.kz saıtyna Astana qalasy ákimi apparatynyń qyzmetkerlerdi basqarý qyzmetinen habarlady.

«Kandıdattardyń bergen qujattaryn, ótkizilgen áńgimelesýdiń nátıjelerin qarap «Astana qalasy ákiminiń apparaty» memlekettik mekemesi bos ákimshilik memlekettik laýazymdaryna ornalasýǵa kandıdattardy iriktep alý jónindegi konkýrstyq komıssııasy sheshim qabyldady:

«Astana qalasynyń Bilim basqarmasy» memlekettik mekemesiniń basshysy (D-O-1) «B» korpýsynyń bos ákimshilik memlekettik laýazymyna ornalasýǵa Sýhanberdıeva Elmıra Amangeldiqyzy usynylsyn», - delingen habarlamada.

Sýhanberdıeva Elmıra 2009 jyldan bastap Astana qalasy № 60 mektep-lıtseıiniń dırektory bolyp istegen. QR bilim berý isiniń qurmetti qyzmetkeri, Іsker ákimshilik etý magıstri. 2012 jyldyń qańtarynda besinshi shaqyrylymdaǵy Astana qalasy máslıhatynyń depýtaty bolyp saılandy. Eńbek jolyn tarıh muǵaliminen bastady. Dırektordyń tárbıe jumystary jónindegi orynbasary, Almaty oblysy Іle aýdany ákimi apparatynyń uıymdastyrý-kadrlyq jumystarynyń bas mamany, Almaty oblysy Іle aýdany orta mektebiniń dırektory, «Qazaqstan» respýblıkalyq teleradıokompanııasy» AQ apparatynyń basshysy qyzmetterin atqardy.

Eske salaıyq, Bilim basqarmasynyń burynǵy basshysy Ásıma Bımendına Ortalyq saılaý komıssııasynyń 2013 jylǵy 22 qarashadaǵy sheshimine sáıkes Májilis depýtaty retinde tirkeldi.