Elmıra Ershumanova: Aýyl ákimderin saılaý – aýyl turǵyndaryna zor múmkinshilik berip otyr

ULYTAÝ. QazAqparat – Aýyl ákimderin saılaý qanshalyqty tıimdi jáne atalmysh format halyqtyń memleketke senimdiligin qanshalyqty arttyratyny jaıly «Ulytaýdyń isker áıelderi» qoǵamdyq birlestiginiń tóraıymy Elmıra Ershumanova aıtyp berdi, dep habarlaıdy QazAqparat tilshisi

Aýyl ákimderin saılaýda engizilip otyrǵan jańa format aýyl turǵyndaryna óz týǵan jerin kórkeıtýge jáne damytýǵa zor múmkindik syılaıdy, dep esepteıdi «Ulytaýdyń isker áıelderi» qoǵamdyq birlestiginiń tóraıymy Elmıra Ershumanova.

«Aýyl ákimderiniń jańa formattaǵy saılaýy jergilikti basqarý men reformalaý strategııalyq mindetterin sheshýge baǵyttalǵan. «Halyq únine qulaq asatyn memleket» tujyrymdamasy aıqyn kórinis tabýda, ıaǵnı halyqqa aýyldy kórkeıtýge jáne damytýǵa atsalysatyn, el múddesin qorǵaıtyn aýyl basshysyn tańdaýǵa mýmkindik berilýde. Sonymen qatar atalmysh saılaý partııalardyń ókilettigin keńeıtý arqyly saıası básekelestikti damytýǵa septigin tıgizbek», - deıdi Elmıra Ershumanova.

Spıkerdiń aıtýynsha, halyqtyń memleketke senimdiligi artyp, jarııalylyq qaǵıdaty ta kórinis tabady.

«Halyqqa osy sekildi saılaý formaty óte tıimdi, sebebi halyq jergilikti jerdiń jyrtyǵyn jamap, baryn asyratyn basshyny ózi saılaıdy. Aýyl turǵyndaryna múmkinshilik berilýde, óz eline adal, memlekettiń baǵdarlamasyn is júzine asyrýǵa jane oryndaýǵa daıyn el azamatyn alǵa tarta alady», - dedi ol.

Esterińizge sala keteıik, Qazaqstan Prezıdenti 2020 jylǵy 1 qyrkúıektegi halyqqa Joldaýynda aýyl ákimderin tikeleı saılaýdy engizý qajettigi týraly aıtqan bolatyn. Qasym-Jomart Toqaev 2021 jylǵy 25 mamyrda «Qazaqstandaǵy saılaý týraly» Konstıtýtsııalyq zańǵa túzetýlerge qol qoıdy.
Qaraǵandy oblysynda búgin, 25 shildede tańǵy jetide saılaý ýchaskeleri ashyldy. Aýyl ákimderiniń alǵashqy tikeleı saılaýy 149 eldi mekende ótýde. 81 myńnan astam saılaýshy ózderiniń konstıtýtsııalyq quqyǵyn júzege asyra alady.