El dıplomattary tájikstandyq sarapshylarmen Májilis saılaýyn talqylady

TAShKENT. QazAqparat - Qazaqstannyń sheteldegi dıplomatııalyq ókildikteri Májilis saılaýyna daıyndyq jumystaryn belsendi júrgizip jatyr. Tájikstan astanasy Dýshanbede Qazaqstannyń Tótenshe jáne Ókiletti elshisi Ýálıhan Tórehanov elimizdegi saılaý naýqanyna oraı BAQ ókilderi men sarapshylar úshin brıfıng ótkizdi, dep habarlaıdy QazAqparat tilshisi.

Alǵash bolyp sóz alǵan qazaqstandyq dıplomat Ýálıhan Tórehanov aldaǵy saılaýdyń mańyzdylyǵyna toqtalyp, onyń erekshelikterin atap ótti.

«Bizdiń elimiz qańtar oqıǵasynan keıin tez es jıyp, saıası jáne áleýmettik-ekonomıkalyq ózgerister arqyly memlekettiligimizdiń negizin odan ári nyǵaıta tústi. 2022 jyly maýsymda ótken jalpyulttyq referendýmnan keıin engizilgen konstıtýtsııalyq túzetýler yqpaldy parlament, prezıdent ókilettikterin shekteý, jańa saıası partııalardy jeńildetilgen tártippen tirkeý, ákimderdi tikeleı saılaýdy jáne basqa da kóptegen mańyzdy jańashyldyqtarǵa jol ashty», - dedi Ýálıhan Tórehanov.

Onyń aıtýynsha, saılaýǵa jańa saıası birlestikterdiń qatysýy kóppartııalyq júıeniń damyǵanyn aıǵaqtaıdy. Sonymen birge bul óz kezeginde oppozıtsııanyń yqpalyn arttyrýǵa baǵyttalǵan.

«Bul - bizdiń elimiz sońǵy birneshe jylda umtylyp kele jatqan úlken meje. Máselen, partııalardyń Májiliske ótý shegi 7 paıyzdan 5 paıyzǵa deıin tómendetildi. Tıisinshe ol oppozıtsııalyq partııalardyń parlamentke ótýine múmkindik usynyp, úkimettiń jaýapkershiligin arttyrýda mańyzdy ról atqarady», - dedi elshi.

Jýrnalısterdiń suraǵyna jaýap bergen Ýálıhan Tórehanov aldaǵy saılaýdyń aralas proportsıonaldy-majorıtarlyq modelde ótetinin aıtty.

Onyń sózinshe, partııalyq tizimder boıynsha depýtattyq mandattardy bólý kezinde áıelder, jastar jáne múgedekterge 30 paıyzdyq kvota qarastyrylady. Bul múddeli toptardyń parlamentte kóbirek ótýine jáne ókildik etýi úshin jasalyp otyr.

«Aldaǵy saılaý qazaqstandyq demokratııany damytý jolyndaǵy taǵy bir mańyzdy kezeń bolady. Kópshilik bizdiń elimizdiń qańtar oqıǵasynan keıin jańa ózgeriske baǵyt alaryna senbedi. Alaıda, biz bul qıyndyqtardy eńsere aldyq jáne mańyzdy saıası, áleýmettik-ekonomıkalyq bastamalardy qolǵa aldyq», - dep túıindedi Ýálıhan Tórehanov.