El boıynsha bir aptada 3,5 myńǵa jýyq qylmys jasalǵan
«Bir apta ishinde 3 348 qylmys jasaldy. Onyń 2 124-i táýlik ishinde ashyldy. Polıtsııa qyzmetkerleri «izin sýytpaı» kisi óltirýge qatysty - 9, ólimge ákep soqqan densaýlyqqa qasaqana aýyr zııan keltirýdiń - 7, tonaýǵa qatysty - 62 jáne bóten múlikti urlaýdyń 500 qylmysyn ashty», - dedi Shuǵyla Turlybek mınıstrliktiń baspasóz alańynda ótken brıfıng barysynda.
Sonymen qatar ol elordada Qazaqstan polıtsııasynyń 30 jyldyǵyna oraı Іshki ister mınıstriniń kýbogine Makarov tapanshasynan atýdan chempıonat ótkenin aıtty. Saıysqa elimizdiń ár óńirindegi polıtsııa departamentteriniń namysyn qorǵaý úshin kelgen komandalarmen qatar, basqa da kúshtik qurylymdardyń mergenderi qatysty.
«Týrnırde Іshki ister organdary bólimsheleri men kúshtik qurylymdar arasyndaǵy úzdikter anyqtaldy. Synǵa túsken qyzmetkerler ózderiniń bar sheberlikterin ortaǵa saldy. Chempıonat qorytyndysy boıynsha aýmaqtyq polıtsııa departamentteriniń arasynda úshinshi oryndy Qaraǵandy oblysy ıelense, ekinshi oryndy Jambyl oblysy enshiledi. Al almatylyq polıtseıler jalpykomandalyq esepte top jardy. Kúshtik qurylymdardyń jalpy komandalyq esebinde úzdik úshtik qatarynan Ulttyq ulannyń komandasy kórindi. Mamandandyrylǵan kúzet qyzmeti basqarmasy kúmis júldeni qanjyǵasyna baılasa, Іshki ister mınıstrliginiń qyzmetkerleri quralaıdy kózge atqan mergen dep tanyldy», - dedi ol.