El bolashaǵynyń dúnıetanymdyq jańa modelin jobalaý, basty qundylyqtar men baǵdardy aıqyndaý mańyzdy - M. Tájın

ASTANA. 5 maýsym. QazAqparat - Búgin Elordadaǵy Eýrazııa ulttyq ýnıversıtetinde QR Memlekettik hatshysy Marat Tájınniń tóraǵalyǵymen Qazaqstan Respýblıkasynyń ulttyq tarıhyn zerdeleý jónindegi vedomstvoaralyq jumys tobynyń keńeıtilgen otyrysy ótýde. Jıynǵa QR Prezıdent Ákimshiliginiń qyzmetkerleri, joǵary laýazymdy bılik ókilderi, tarıhshylar, tanymal jýrnalıster men ǵalym, jazýshylar qatysýda.

«Búgingi Qazaqstan - qalyptasqan memleket. Biz memleket qurýdyń jańa belesine shyqtyq. Memleket basshysy jarııalaǵan «Qazaqstan - 2050» Strategııasy qoǵam damýynyń jańa belesindegi basty suraqtarǵa, atap aıtqanda, biz qaıda baramyz jáne 2050 jyly qandaı bolǵymyz keledi degen suraqtarǵa jaýap beredi. Keńinen qamtyp aıtsaq, másele el bolashaǵynyń dúnıetanymdyq jańa modelin jobalaý, basty qundylyqtar men baǵdarlardy aıqyndaý týraly bolyp otyr», - dedi M. Tájın alqaly keńesti ashý barysynda.

Onyń aıtýynsha, bundaı qundylyqtar qazirgi zamanǵy, bolashaqqa umtylǵan qundylyqtar bolyp, jahandanyp, ulttyq ózgesheligimizdi shaıyp bara jatqan álemdegi bizdiń ulttyq biregeıligimizdi nyǵaıtýy tıis. «Olar ulttyń mádenı kodyn: tilin, rýhanııatyn, dástúrlerin, mádenıetin saqtaýdy qamtamasyz etýi tıis. Al máseleniń bulaı qoıylýy bizdiń nazarymyzdy ulttyq tarıhty zertteý máselelerine obektıvti túrde aýdarady» dep atap ótti M.Tájın.