El aýmaǵynda zańsyz qarý saqtaý týraly 240 materıal tirkeldi – QR ІІM

NUR-SULTAN. QazAqparat – 3 aqpannan bastap el aýmaǵynda «Qarý» jedel aldyn alý sharasy ótip jatyr. Bul týraly QR ІІM baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.

Onyń aıtýynsha, shara qarýdy qoldanyp jasalatyn qylmystardyń aldyn alýǵa baǵyttalǵan. Budan basqa, zańsyz aınalymdaǵy qarý men oq-dárilerdi anyqtaý jáne tárkileý jumystary da júrgizilýde.

«Azamattyq jáne qyzmettik qarý aınalymyna únemi baqylaý júrgiziledi. Polıtsııa organdarynda 234 myńnan astam azamattyq qarý ıeleri jáne 2 myńnan astam qyzmettik qarý sýbektileri esepte tur. Qabyldanǵan sharalar nátıjesinde zańsyz aınalymnan 700-den astam atys qarýy jáne oıyq qarýdyń 4 myńnan astam patrondary alyndy. Qarýdy zańsyz saqtaǵany jáne alyp júrgeni úshin qylmystyq jaýapkershilikti kózdeıtin 240 materıal tirkeldi. Ákimshilik jaýapqa 348 azamat tartyldy», - dedi Sh. Turlybek mınıstrliktiń baspasóz alańynda ótken brıfıngte.

Sonymen birge, 2 myńǵa jýyq zańdy tulǵa, onyń ishinde 76 qarý-jaraq saýdasy jónindegi mamandandyrylǵan dúken tekserildi. 50 myńnan astam fermerlik, sharýa qojalyqtary, 160 myńnan astam azamattyq qarý ıeleri tekserildi. Tekserý nátıjesinde 3,5 myńǵa jýyq buzýshylyq anyqtaldy. Onyń ishinde, qarýdy saqtaý jáne alyp júrý erejesi – 2,2 myń ret, ony tirkeý jáne qaıta tirkeý tártibi – 1,3 myń ret buzylǵan.