El aýmaǵyna zańsyz ákelingen Ariel men Gilette ónimderiniń kózi joıylady
Almaty qalalyq ádilet departamentiniń málimetinshe, sáýir aıynda QR aýmaǵyna jalpy salmaǵy 5,5 tonna bolatyn ARIEL kir jýǵysh untaǵynyń 1640 qaptamasy zańsyz ımporttalǵan.
«Bul ónimniń shyǵý tegi belgisiz, sapasy kúmándi. Sondaı-aq ónimde ARIEL taýar belgisi bar, degenmen, ónimdi ákelý úshin taýar belgisi quqyq ıesiniń kelisimi qajet. Importtaýshy mundaı kelisimdi almaǵan. Osyǵan baılanysty memlekettik kirister departamenti qyzmetkerleri atalmysh taýardy Qazaqstan aýmaǵyna ákelýdi toqtatty», - dep habarlady vedomstvoda.
Odan bólek, qalalyq ádilet departamenti júrgizgen kelissóz men quqyqtyq túsindirý jumystarynyń nátıjesinde taýar belgisiniń quqyq ıesi men ımporttaýshy arasynda tatýlasýǵa qol jetkizildi, al taýar joıylýǵa berildi.
Sondaı-aq, atalǵan ımporttaýshy 600 birlik GILLETTE ustarasyn da elge ákelgen.
Bul rette GILLETTE taýar belgisiniń quqyq ıesi de bul áreketke kelisim bermegen. Qazirgi ýaqytta taýarlar joıylýǵa berildi.
«Bul taýar sertıfıkattalmaǵan, onyń qaptamasy QR aýmaǵynda qoldanylatyn tehnıkalyq reglamentke sáıkes kelmeıdi, sondaı-aq taýardyń shyǵý tegi belgisiz bolyp tabylady. Osyǵan baılanysty osy taýardy Qazaqstan aýmaǵynda aınalymǵa shyǵarý tutynýshylarǵa zııan keltirý qaýpin týdyrýy múmkin», - dep málim etti ádilet departamenti.
Zııatkerlik menshik quqyǵyn «Ádilet organdary týraly» zańǵa sáıkes ádilet organdary qorǵaıdy.