El aýmaǵyn qamtıtyn iri týrıstik baǵyttar jasaqtaý usynyldy

NUR-SULTAN. QazAqparat – Búgin Almatyda týroperatorlarmen, bıznesmendermen, «Kazakh Tourism» ulttyq kompanııasy» AQ jáne Almaty qalasy men oblysy ákimdikteriniń ókilderimen kezdesken Mádenıet jáne sport mınıstri Dáýren Abaev jańa týrıstik baǵyttardy qurý jáne jaılastyrý máselelerin talqylady, dep habarlaıdy QazAqparat vedomstvoǵa silteme jasap.

«Biz shet elderdegi kóptegen grand týrlardy bilemiz. Mysaly, Shveıtsarııada búkil el aýmaǵyn qamtıtyn úlken týr ótedi. Ony týrıster bólip-bólip nemese tolyǵymen ótkize alady. Osylaısha, bir saıahatta búkil baǵytty bile alasyz. Marshrýt boıynda túrli taqyryptarǵa arnalǵan, kóliktiń ár túrimen uıymdastyrylatyn, birneshe is-shara usynatyn týrlar qurylýy múmkin», - dep atap ótti mınıstr.

Mınıstrlik osy baǵyttardy josparly túrde damytýdy usynady. Aldymen, tańdalǵan marshrýttardy abattandyrý, ekinshi kezeńde «jumsaq» ınfraqurylymdy jáne marshrýttardy sapaly turǵyda damytý. Kelesi kezeń – týroperatorlarmen birge maqsatty túrde týrlardy belsendi jyljytý.

Buǵan deıin «Kazakh Tourism» ulttyq kompanııasy» AQ basqarma tóraǵasy Talǵat Amanbaev pandemııa saldarynan otandyq týrızm mıllıardtaǵan shyǵynǵa batqanyn málim etken.